Көкшетау еліміздің цифрлық инновациялар картасына нық қадаммен еніп келеді. Екі жылға жетпейтін уақытта өңірлік IT-хаб «Aqmola Hub» жаңа идеялар туатын, стартаптар өсіп-жетілетін және жас IT-мамандардың қауымдастығы қалыптасатын алаңға айналды. Олар бүгінде ұлттық қана емес, халықаралық деңгейде де бәсекеге түсуге дайын, деп хабарлайды Todayinfo ақпараттық агенттігі.
Хабты құру бастамасы Мемлекет басшысы Қасым-Жомарт Тоқаевтың 2023 жылғы 1 қыркүйектегі Жолдауын іске асыру аясында көтерілді. Сол жылдың 27 қыркүйегінде Көкшетауда Автономды кластерлік қордың «Инновациялық технологиялар паркі» филиалы жұмысын бастады.
Бүгінде «Aqmola Hub» IT-мамандардың арманын шынайы жоспарға айналдыратын, стартаптарға нақты қолдау көрсететін орын ретінде аталып жүр.
«Біздің мақсатымыз – Ақмола облысының талантты жастары өз идеяларын осында жүзеге асыра алатындай жағдай жасау. Aqmola Hub – идеялар өнімге, ал амбициялар нәтижеге айналатын алаң», – дейді филиал директоры Диан Айбашпанов.
Екі жылға жетпейтін уақыт ішінде мұнда 200-ден астам іс-шара өтіп, 3 мыңнан астам қатысушыны жинады. Классикалық воркшоптармен қатар ерекше форматтар да бар: стартаптарды әріптестер мен сарапшылар сынға алатын «Прожарка стартапов», еркін ортада жас кәсіпкерлер идеяларын қорғайтын «Pizza Pitch», сондай-ақ 90 команда бақ сынаған алғашқы Kokshetau Digital Hackathon.
Мұның бәрі студенттер, IT-мамандар мен кәсіпкерлер бір тілде сөйлесіп, жаңа жобалар бір шыны кофе үстінде дүниеге келетін атмосфера қалыптастырады.
Жаңа буынның символына айналған мысалдардың бірі – Көкшетаулық 15 жастағы мектеп оқушысы. Ол шынайы өмірді бейнелейтін «Aqmola RP» атты мобильді ойын жасап шығарды. Тек екі күннің ішінде бұл ойынды әлемнің түкпір-түкпірінен 2,5 мыңнан астам қолданушы сынап көрді. Бұл – жас дарындарға ұзақ жылдар емес, тек дұрыс орта мен қолдау жеткілікті екенін көрсетеді.
Хабтың басты бағыттарының бірі – білім беру. 2 мыңнан астам ақмолалық Astana Hub бағдарламалары бойынша оқудан өтті.
Мемлекеттік «Tech Orda» бағдарламасы арқасында 200-ден астам жас ақмолалық 600 мың теңгеге дейінгі грант алып, Көкшетаудағы жеке IT-мектептерде оқуға мүмкіндік алды. Мұнда бағдарламалау тілдерімен қатар жасанды интеллектіні үйретеді – болашақ мамандықтар бүгінде нақты кәсіпке айналып отыр.
Сонымен қатар 700-ден астам қатысушы деректер аналитикасы, веб-дизайн, робототехника бойынша мастер-класстарға қатысты. AI Movement бағдарламасы аясында Қазақстандағы жасанды интеллектіні дамытуға арналған 22 кездесу өтті.
Қазір Ақмола облысында 60-тан астам стартап белсенді дамып келеді. Олар FinTech, AgriTech, GameDev, TravelTech және AI салаларында жұмыс істейді. Хаб олардың дамуына барлық жағдай жасауда: сарапшылармен трек-сессиялар, бизнес-инкубация, тегін коворкинг пен инвесторлармен кездесулер ұйымдастырылады.
Aqmola Hub бизнесті мемлекеттік қолдау құралдарын барынша пайдалануға көмектесуде. Astana Hub қатысушы-компаниялары салықтық жеңілдіктерге ие. 2024 жылы өңірде осындай 15 компания тіркеліп, 50-ден астам жаңа жұмыс орны ашылды.
Бұған дейін Көкшетау көбіне мәдениет пен білім ордасы ретінде танылып келген болса, бүгінде ол технологиялар қаласы ретінде де айқындала түсуде. Қазіргі даму қарқыны сақталса, алдағы бірнеше жылда Aqmola Hub аймақтық қана емес, халықаралық деңгейдегі цифрлық инновациялар орталығы ретінде аталатыны сөзсіз.
фото: newsinfo.ru
