Түркістан қаласының әкімі Әзімбек Пазылбекұлы тұрғындарды жеке мәселелері бойынша қабылдау өткізді. Әр айдың екінші сәрсенбісінде дәстүрлі түрде бекітілген кестеге сәйкес ұйымдастырылған қабылдауға осы жолы алдын-ала жазылу арқылы 16 қала тұрғыны қатысты. Қабылдауда тұрғын үй, жұмысқа орналасу, бейнебақылау камераларын орнату, коммуналдық шаруашылық, әлеуметтік қолдау және жер мәселелеріне қатысты сұрақтар қаралды.
Әзімбек Пазылбекұлының айтуынша, барлық өтініштер егжей-тегжейлі талқыланып, кейбірі сол жерде шешімін тапты, ал күрделі мәселелер жеке бақылауға алынды. Қала әкімі тұрғындардың мәселелерін жедел шешу және халықпен тұрақты байланыс орнату әкімдіктің басты міндеті екенін атап өтті.
«Тұрғындардың сұрақтарына уақыт күттірмей жауап беру және мәселелерін жедел шешу үшін орынбасарларыма және бөлім басшыларына нақты тапсырмалар бердім. Біз үшін басты мақсат – халықпен сындарлы диалог орнатып, қаланың өмір сапасын жақсарту,» – деді Әзімбек Пазылбекұлы.
Әкімдік тұрғындардың жеке мәселелерін тыңдау арқылы қаланың өзекті сұрақтарын анықтап, шешудің жүйелі тәсілдерін енгізуде. Түркістан тұрғындары үшін қолайлы жағдай жасауға бағытталған бұл қабылдаулар олардың өмір сапасын арттыруға үлкен септігін тигізуде.
PS: Түркістан қаласының әкімдігі халықтың сұранысын ескеріп, қала дамуын әр тұрғынның ұсынысымен жақсартуға атсалысуда.
