Ресей Президенті Владимир Путин Әзербайжан басшысы Ильхам Әлиевпен телефон арқылы сөйлесіп, Ресей әуе кеңістігінде орын алған, салдарынан Azerbaijan Airlines ұшағының Ақтау маңында апатқа ұшырауына алып келген оқиға үшін кешірім сұрады, деп хабарлайды Todayinfo.kz Кремльдің баспасөз қызметіне сілтеме жасап.
Әлиевтің Путинге не деп айтқаны туралы Әзербайжан Президентінің баспасөз қызметі хабарлады
«Владимир Путин Ресей әуе кеңістігінде осындай қайғылы оқиғаның болғанына байланысты кешірім сұрап, қаза тапқандардың отбасыларына тағы да терең көңіл айтты әрі зардап шеккендерге тез сауығып кетуін тіледі. Әңгіме барысында белгіленген кесте бойынша ұшып келе жатқан Әзербайжанның жолаушылар ұшағы Грозный әуежайына бірнеше рет қонуға әрекет жасағаны айтылды. Сол кезде Грозный, Моздок және Владикавказ қалаларына украиналық ұшқышсыз ұшу аппараттары шабуыл жасап жатқан болатын, ал Ресейдің әуе қорғанысы күштері осы шабуылдарды тоқтатуға тырысқан», – делінген хабарламада.
Ресей Тергеу комитеті Қылмыстық кодекстің 263-бабы (әуе көлігінің қозғалысы және пайдалану қауіпсіздігі ережелерін бұзу) бойынша қылмыстық іс қозғады. Алғашқы тергеу жұмыстары жүргізіліп жатыр, азаматтық және әскери мамандардан жауап алынады.
Қазіргі уақытта Әзірбайжан Бас прокуратурасының екі қызметкері Грозныйда тергеу ісіне қатысып, Ресей Федерациясы Бас прокуратурасы және Тергеу комитетінің өкілдерімен бірге жұмыс істеп жатыр. Ресей, Әзірбайжан және Қазақстанның тиісті қызметтері Ақтау маңындағы апат орнында бірлесіп іс-әрекет атқаруда.
Баку – Грозный ұшағы неден құлады
25 желтоқсанда Ақтау маңында Azerbaijan Airlines компаниясының Baku (Әзербайжан) – Грозный (Ресей) бағыты бойынша AHY8243 рейсімен ұшқан жолаушылар ұшағы апатқа ұшырады.
Ұшақ Бакуден Астана уақыты бойынша 08:49-да, жоспарланған уақыттан 11 минут ерте ұшқан. Кейін экипаж «төтенше жағдай» (squawk 7700) сигналын берген. Ұшқыштар шұғыл қонуға өтінім жасады, Ақтау әуежайы ұшақты қабылдауға дайындалды, алайда 11:30 шамасында ұшақ әуежайдан 3 шақырым жерде құлаған. Тараған ақпарат бойынша, ұшаққа Грозный аспанында оқ тиген.
Ұшақ бортында қанша адам болған?
Қазақстан ТЖМ ақпаратына сүйенсек, бортта 62 жолаушы және 5 экипаж мүшесі болған:
- 42 Әзірбайжан азаматы;
- 16 Ресей азаматы;
- 6 Қазақстан азаматы;
- 3 Қырғызстан азаматы.
Аман қалғандардың қатарында Әзірбайжан, Ресей және Қырғызстан азаматтары бар. Қазақстандықтар арасында аман қалғандар жоқ.
Қаза болған қазақстандықтардың тізімі:
- Тулесинов Сандибек Екибаевич, 16.11.1988 жылы туған, Маңғыстау облысының тумасы, Жаңаөзен қаласында тұрған.
- Джумагулов Бауыржан Джумабаевич, 30.09.1985 жылы туған, Маңғыстау облысының тумасы, Жаңаөзен қаласында тұрған.
- Махсудова Галина Растамбековна, 12.01.1978 жылы туған, Маңғыстау облысының тумасы, Ақтау қаласында тұрған.
- Шаймерденова Гаухар Жумагатовна, 17.07.1975 жылы туған, Алматы қаласының тумасы, Астана қаласында тұрған.
- Жумагат Эльдар (Гаухар Шаймерденованың ұлы), 23.08.2013 жылы туған, Астана қаласында тұрған.
- Джутаева Салима Аманжоловна, 21.02.1995 жылы туған, Қостанай облысының тумасы, Қарағанды қаласында тұрған.
