Алматы қаласының тұрғындары мен қонақтары үшін жағымды жаңалық — Алмаарасан шатқалына апарар негізгі жолдың жабыны жаңартылып жатыр. Қала әкімдігінің ресми мәліметіне сүйенсек, жөндеу жұмыстары Дулати даңғылының бойында жүргізілді, деп хабарлайды Todayinfo ақпараттық агенттігі.
Бостандық ауданы аумағындағы бұл даңғылдағы жол бір тәулікке уақытша жабылып, орташа жөндеу жұмыстары жүргізілді. Нақтырақ айтқанда, Сапарлы жол көшесінен бастап Экологиялық постқа дейінгі аралықта жаңа асфальт төселді. Жөндеу жұмыстарын тәжірибелі “КомпанияАлматыДорСтрой” ЖШС қолға алған.
Жол сапасына ерекше назар аударылуда. Құрылыс материалдарының сапасы мен жөндеу технологиялары Жол активтері сапасының ұлттық орталығының Алматы қалалық филиалы мамандарының бақылауында. Инженерлер жол құрылысында пайдаланылған материалдардан сынама алып, оларды зертханада тексеруге жіберді. Жол жабыны төселіп болған соң да қабаттан керн сынамалары алынып, қосымша сараптама жүргізіледі.
Жаңартылған жол жабыны Алмаарасан бағытына қатынайтын көліктер үшін қауіпсіз әрі ыңғайлы қозғалыс жасауға мүмкіндік береді. Табиғат аясында демалуға шыққан алматылықтар мен туристер үшін бұл — қолайлы жаңалық.
