30 маусым күні Алматы облысы, Алмалыбақ ауылындағы футбол алаңында ауыр оқиға орын алды. 10 жасар Максим Головачевке қаңғыбас ит шабуыл жасап, бала ауыр жарақат алды. Оқиға орнына құзырлы органдар жеткенге дейін, ауыл тұрғыны Серікбек Сақайбаев дереу әрекет етіп, баланың өміріне араша түсті,деп хабарлайды Todayinfo ақпарат порталы.
Серікбек мырза өз өміріне төнген қауіпке қарамастан, итке қарсы шығып, оны бейтараптандырды. Бұл әрекеті шынайы азаматтық батылдық пен ерліктің үлгісі ретінде бағаланды.
Серікбек Сақайбаевтың ерлігі Қарасай ауданы әкімдігі тарапынан арнайы ұйымдастырылған марапаттау шарасында атап өтілді. Аудан әкімінің міндетін атқарушы Рустам Атшабаров Серікбек мырзаға Алғыс хат пен демеушілер атынан қаржылай сыйлық табыстады.
Шараға аудандық полиция басқармасының басшысы Нұсқабек Зауланбаев, ТЖ бөлімі басшысы Бағдат Шәріпбеков, және Қарасай аудандық ақсақалдар кеңесінің төрағасы Сағат Мәсімақынов қатысып, Серікбек Сақайбаевқа Алғыс хаттар мен естелік сыйлықтар табыс етті. Ақсақалдар кеңесі өкілі батасын беріп, бұл ерліктің елге үлгі болатынын ерекше атап өтті.
Бұл оқиға – бейқамдық пен бақылаусыздықтың адам өміріне қаншалықты қауіп төндіретінін көрсететін елеулі сабақ. Қарасай ауданы әкімдігі тұрғындарды заңсыз және бақылаусыз ит ұстау фактілері байқалған жағдайда бірден құқық қорғау органдарына немесе әкімдікке хабар беруге шақырды.
Аудан әкімдігі 10 жасар Максимнің денсаулығы жақсарғанын хабарлап, оның тезірек сауығып кетуін тілейді. Оқиға толық бақылауға алынған.
«Адам өмірі мен қоғамдық қауіпсіздік – біздің ең басты құндылықтарымыз», – делінген ресми мәлімдемеде.
