Алматы қаласының әкімі Ерболат Досаев жұмыс сапары аясында Полиция департаментінің қызметкерлері мен олардың отбасысы үшін ұйымдастырылған Наурыз мейрамына қатысты, деп хабарлайды Todayinfo ақпараттық порталы.
Соңғы үш жыл ішінде Алматы әкімдігі азаматтардың қауіпсіздігін қамтамасыз ететін маңызды құрылымдық мекеменің бірі ретінде полицияның дамуына ерекше көңіл бөліп келеді. Атап айтқанда, Алматы әкіміне жергілікті бюджет қаражатына сатып алынған жаңа техника мен толықтай жөндеуден өткен әкімшілік ғимарат таныстырылды. Бұл ғимарат Алматы әкімдігі тарапынан жеке меншік иесінен 1,7 млрд теңгеге сатып алынып, өткен жылдың қыркүйек айында полиция балансына берілген еді. Бүгінде бұл ғимарат шамамен 300 қызметкерге қолайлы жұмыс жағдай жасап отыр және Полиция департаментінің негізгі ғимаратына жақын орналасқан, бұл құқық қорғаушылардың жұмысын жеделдетуге ықпал етеді.
Бұл Алматы полициясының материалдық-техникалық базасын нығайту және қоғамдық қауіпсіздік жүйесін жаңғырту бойынша жүргізіліп жатқан ауқымды бағдарламаның бір бөлігі.
Шаһар басшысы қоғамдық қауіпсіздік жүйесін нығайту қала саясатының басым бағытының бірі болып қала беретінін атап өтті. Өз кезегінде Полиция департаментінің басшылығы көрсетіліп жатқан қолдау үшін алғыс білдірді.
Айта кету керек, Алматыда қоғамдық қауіпсіздік саласында озық шешімдер енгізіліп жатыр. Ерболат Досаевтың тапсырмасына сәйкес, қаладағы мемлекеттік мектептер мен балабақшаларда кешенді қауіпсіздік жүйесі жүзеге асырылуда, сондай-ақ жасанды интеллект элементтері бар бейнемониторинг белсенді қолданылып отыр. Биыл жыл соңына дейін Бірыңғай бейнебақылау жүйесіне қосылған камералар саны 70 мыңға дейін ұлғайтылады.
Сонымен қатар, сапар барысында Мемлекет басшысының тапсырмасымен Ерболат Досаев полиция капитаны Қарашаш Есдәулетоваға пәтер сертификатын табыстады. Ол Дубайда өткен UAE SWAT Challenge 2025 халықаралық турнирінде жүлдегер атанды. Оның командасы әлемнің ең үздік арнайы бөлімшелері арасында екінші орын иеленді.
Айта кетейік, Қарашаш Есдәулетова Қазақстан ІІМ-нің алғашқы әйелдер командасы — «Томирис» құрамында өнер көрсетті. Бұл команда осы беделді жарысқа алғаш рет қатысып, бейресми түрде арнайы жасақтың «Олимпиадасы» саналатын, әлемнің элиталық тактикалық бөлімшелерін жинайтын турнирде бақ сынады.
