Қазақстан Республикасының Президенті Қасым-Жомарт Тоқаевтың тапсырмасы бойынша Алматы қаласының әкімі Дархан Сатыбалды мегаполистің мәдениет және еңбек ұжымдарының көрнекті өкілдеріне мемлекеттік наградаларды табыс етті, деп хабарлайды Todayinfo ақпараттық агенттігі.
«Отан» орденімен отандық әдебиетті дамытуға, рухани құндылықтарды сақтауға және қазақ мәдениетін ілгерілетуге қосқан зор үлесі үшін белгілі қазақстандық жазушы Тынымбай Нұрмағанбетов марапатталды. Салтанатты рәсім 2025 жылы елімізде жарияланған Жұмысшы мамандықтар жылы аясында өтті.
Тынымбай Нұрмағанбетовті құттықтай отырып, Алматы әкімі жазушыға көп жылғы әдеби қызметі, ұлттық идеяға адалдығы және Қазақстанның рухани мұрасын дамытуға қосқан елеулі үлесі үшін алғыс білдірді.
Тынымбай Нұрмағанбетұлы Нұрмағанбетов — қазіргі қазақ прозасының жарқын өкілдерінің бірі, еңбек ардагері. 1945 жылы Қызылорда облысы Жаңақорған ауданында дүниеге келген. Н. В. Гоголь атындағы Қызылорда педагогикалық институтының филология факультетін, сондай-ақ, Мәскеудегі М. Горький атындағы Әдебиет институтының жанындағы Жоғары әдеби курстарды бітірген.
Жарты ғасырдан астам шығармашылық қызмет барысында жазушы оннан астам жинақ шығарды, оның ішінде «Қауын иісі», «Қош бол, ата», «Қарлығаштың ұясы», «Тұнық су», «Айқай» және басқалары бар. Жазушы шығармалары ірі одақтас баспаларда жарық көрді, орыс және басқа да бірқатар тілге аударылды. Ал оның пьесалары желісімен қойылымдар қазақ театрларының сахналарында қойылып келеді.
М. Горький атындағы Бүкілодақтық жастар сыйлығының және Қазақстан Республикасының Абай атындағы әдебиет және өнер саласындағы Мемлекеттік сыйлығының лауреаты, «Құрмет» орденінің иегері Тынымбай Нұрмағанбетов қазақ мәдениетін байытуға және қоғамның рухани дамуына баға жетпес үлес қосты.
Сонымен қатар Мемлекет басшысының тапсырмасы бойынша Аханаев Дөнесбай Өтепбайұлы марапатталды. Ол — «Алматы Су» МКК Түрксіб аудандық пайдалану учаскесінің слесарі.
Кәсіпорында жұмыс істеген кезден бері Дөнесбай Өтепбайұлы өзін кәсіби білікті, еңбекқор, жауапты және іскер қызметкер ретінде көрсетті. Апатты учаскелерге жедел барып, шұғыл және ұтымды шешімдерді дереу қабылдау қабілетімен ерекшеленеді.
«Алматы Су» МКК Жетісу аудандық пайдалану учаскесінің слесарі Литвинов Дмитрий Александрович те «Ерен еңбегі үшін» медалімен марапатталды. Дмитрий Александрович өзінің күнделікті қажырлы еңбегі арқылы Алматы қаласының су құбыры желілерінің үздіксіз жұмыс істеуін қамтамасыз етуге елеулі үлес қосып келеді. Соның арқасында шаһардың он мыңнан асатын тұрғыны сапалы және тұрақты ауыз сумен қамтамасыз етілуде.
Мемлекеттік марапаттар көп жылғы адал еңбек, жоғары кәсібилік, қала шаруашылығының дамуына қосқан елеулі үлес үшін табысталды.
