Ішкі істер министрінің орынбасары Санжар Әділов Алматы әуежайында қызметкерге шабуыл жасаған ер адамның қанша жылға сотталуы мүмкін екенін айтты, деп хабарлайды Todayinfo агенттігі.
«Әр қылмыстық баптар бойынша жауапкершілік қарастырылған. Саралау нәтижесінде бұл ауыр қылмыстар санатына жатқызылды. Қазіргі таңда іс соттың құзырында. Санкция бойынша күдікті 12 жылға дейін бас бостандығынан айырылуы мүмкін», – деді Әділов Мәжіліс кулуарында.
Оның айтуынша, күдіктіге бірнеше қылмыстық бап бойынша іс қозғалған:
🔹 Кепілге алу (ҚР ҚК-нің 261-бабы 2-бөлігі 4-тармағы) – мүлкі тәркіленіп, 7 жылдан 12 жылға дейін бас бостандығынан айыру жазасы.
🔹 Қару қолдану арқылы жасалған бұзақылық (ҚР ҚК-нің 293-бабы 3-бөлігі) – 3 жылдан 7 жылға дейін бас бостандығынан айыру.
🔹 Терроризм актісі туралы көрінеу жалған хабарлау (ҚР ҚК-нің 273-бабы) – 5 000 АЕК мөлшерінде айыппұл немесе 5 жылға дейін бас бостандығынан айыру жазасы.
Қазіргі таңда іс сот қарауында, ал құқық қорғау органдары оқиғаның барлық мән-жайын зерттеуде.
