Алматыда Республика күніне орай №138 мектептің күрделі жөндеуі аяқталды, бұл туралы Todayinfo.kz ақпарат порталы хабарлайды.
Алматы әкімі Ерболат Досаев жұмыс сапары барысында Бостандық ауданы Көктем-1 шағын ауданындағы жөндеуден өткен №138 мектепті көріп шықты.
1989 жылы салынған ғимараттың конструкциясының сенімділігін техникалық тексеру нәтижесінде қала әкімі мектепті сейсмикалық нығайту мен күрделі жөндеуден өткізу жөнінде тапсырма берді.
Мердігерлік ұйымның жұмысы 2023 жылдың желтоқсанында басталып, биыл қазан айының соңында аяқталды. Реконструкция жобасында ғимараттың жүктемені көтеруші құрылымын нығайтуға ерекше көңіл бөлінді. Жобада қасбет пен шатырды жөндеу, инженерлік жүйелерді ауыстыру және ғимараттың ішкі әрлеуі қарастырылған.
Бұл туралы пікірін білдірген мектеп директоры Медет Иманбекұлы: «Бүгін Алматы қаласы әкімі Ерболат Асқарбаекұлы келіп мектебіміздің күрделі жөндеуден кейінгі жағдайын көріп аралап шықты. Мектептің 35 жылдық тарихы бар. Мектеп көнерген болатын. Осы көне мектепті сейсмокүшейтілген, балаларға ыңғайлы етіп қайта жөндеп шықтық. Оқу орнына толықтай дизайн жасалды. Бастауыш оқушыларына кіші спорт зал, пәндік кабинеттер жасақталды, қыздар-ұлдарға арнайы бөлмелер жасалды. Екінші тоқсанда бәріміз жаңа ғимаратқа оқуға ораламыз. Жаңа парталар, жаңа интерактивті тақталар, моноблоктар қойылды. Коверкинг кітапхана жаңарып балаларға барынша жағдай жасауға тырыстық» дейді.
Оқу орны биология, робототехника, информатика, химия пәндеріне арналған интерактивті тақталар мен планшеттермен жабдықталған кабинеттермен қамтылған. Сонымен қатар, заманауи стандарттарға сәйкес екі спорт және акт залы жабдықталған. Футбол алаңы мен спорт алаңы жаңартылды. Мектепте қауіпсіздікті қамтамасыз ету мақсатында бейнебақылау камералары мен бет-әлпетті тану мүмкіндігі бар турникеттер орнатылған. Мектепте 797 бала мемлекеттік тілде оқитын болады.
Ерболат Досаев білім басқармасының басшысы мен мектеп әкімшілігіне мектепті II тоқсанның басына дейін Kitap.kz цифрлық кітапханасына қосу жөнінде тапсырма берді. Бұл кітапхана оқушыларға электронды және аудио форматтағы 6000-нан астам көркем әдебиет шығармасына қолжетімділікті қамтамасыз етеді. Сонымен қатар, аудан әкімдігіне мектепке жақын аумақтың санитарлық жағдайын қамтамасыз ету жүктелді.
Айта кету керек, оқушылардың орны тапшылығын қысқарту мақсатында қалада бүгінгі таңда Зерделі шағын ауданында 550 орындық мектеп, әртүрлі аудандарда 5 қосымша құрылыс, сондай-ақ 6 мектептің күрделі жөндеуі мен реконструкциясы жүргізілуде. Бұған қоса, мегаполисте «Жайлы мектеп» ұлттық жобасы бойынша 21 нысанның құрылысын жүргізу жалғасуда. Еске салсақ, қаладағы алғашқы «Жайлы мектеп» биыл қыркүйек айында ашылды.
