Алматы облысы Іле ауданының әкімі Бағдат Қарасаев қызметтік өкілеттігін асыра пайдаланғаны үшін Антикор тарапынан ұсталып, қамауға алынды. Әкім қызметтік өкілеттілігін теріс пайдаланған, деп хабарлайды Todayinfo.kz.
Оған лауазымдық міндеттерін теріс пайдалану және билік немесе қызметтік өкілеттіктерін асыра пайдалану бойынша айып тағылуда.
«Сыбайлас жемқорлыққа қарсы қызмет сотқа дейінгі тергеп-тексеру шеңберінде Алматы облысының аудан әкімі мен басқа да тұлғалардың әшкереленгенін растайды. Соттың санкциясымен аудан әкімі қамауға алынды. Тергеу жалғасуда. ҚР ҚПК-нің 201-бабына сәйкес өзге де ақпарат таратылуға жатпайды», — деп мәлімдеді Алматы облыстық Сыбайлас жемқорлыққа қарсы департаменттің баспасөз қызметі.
Ол 1964 жылы Талдықорған облысы (Қазіргі Жетісу облысы) Дзержинск (Тоқжайлау) ауылында туған. Орта мектепті бітіргеннен кейін Алматы теміржол көлігі инженерлері институтына түсіп, 1986 жылы «қатынас жолдары инженері» мамандығы бойынша бітірді. Кеңес Армиясында қызмет еткеннен кейін туған ауылына оралып, СПТУ—1 оқытушысы болып жұмыс істей бастады. Кәсіптік білім беру жүйесінде жұмыс істей отырып, қарапайым мұғалімнен мектеп директорына дейінгі жолдан өтті. 2001-2004 жылдары «Алакөл—Агро« ЖШС, «ТЅС—Агро« ЖШС, «Тау—Самал Ltd» компаниясы ЖШС директоры болып жұмыс істеді. 2004 жылдың қазан айында Алакөл ауданы әкімінің орынбасары, ал келесі айда сол ауданның әкімі болып тағайындалды. Бұл қызметте ол 2011 жылдың мамырына дейін жұмыс істеді. Кейін облыс әкімдігіне әкім аппаратының басшысы лауазымына ауыстырылды. 2015 жылдың қарашасынан 2018 жылдың қыркүйегіне дейін Талдықорған қаласының әкімі қызметін атқарды. 2018 жылдың қыркүйегінде Іле ауданының әкімі болып тағайындалды.
«Айта кету керек, облыс әкімінің 2022 жылғы 5 қыркүйектегі шешімімен Іле ауданы әкімінің өкілеттік мерзімі 2024 жылғы 3 қыркүйекке дейін ұзартылған. Қазіргі уақытта келісімшарт мерзімі аяқталды, сондықтан өкілеттік уақыты да аяқталды», — деп хабарлады облыс әкімдігі.
