Алматы облысында халықты жұмыспен қамту бағытындағы жұмыстар қарқынды жүріп жатыр. Тек соңғы бір аптада өңірде 995 жаңа жұмыс орны ашылып, олардың 420-сына азаматтар тұрақты жұмысқа орналастырылды, деп хабарлайды Todayinfo.
Ең көп жұмыс орны білім беру саласында. 112 мұғалім мен тәрбиеші мектептер мен балабақшаларға жұмысқа қабылданды. Жаңа мамандардың басым бөлігі Қарғалы ауылындағы №1 мектеп-лицейге, Райымбек ауданындағы балалар-жасөспірімдер спорт мектебіне және А. Бейсеуов атындағы орта мектепке орналасты.
Денсаулық сақтау саласы да жаңа кадрлармен толықты. Алматы облыстық балалар клиникалық ауруханасы мен арнайы әлеуметтік қызмет көрсету орталығына 45 медициналық маман жұмысқа алынды.
Бұдан бөлек:
Көлік және қойма шаруашылығы саласына – 65 адам,
Өнеркәсіпке – 24 адам,
Балық шаруашылығына – 15 адам,
Құрылысқа – 10 адам жұмысқа орналасты.
Өңірдегі негізгі жұмыс берушілер:
«Жетісу Вольфрамы» ЖШС
«Төре Жайлау» ЖШС
Білім беру және денсаулық сақтау ұйымдары
Жаңадан ашылған 995 жұмыс орнының 567-сі субсидияланған, ал 428 бос жұмыс орны enbek.kz порталына жарияланды.
Жұмыспен қамту және әлеуметтік бағдарламалар басқармасының басшысы Айгүл Матановна бұл бағытта жұмыстың жалғасатынын атап өтті.
«Жаңа жұмыс орындарын ашу – біздің басты міндетіміз. Біз жұмыс берушілермен тығыз байланыстамыз, жұмыс іздеушілерге қолайлы бос орындарды таңдауға көмектесеміз. Әрбір азаматтың тұрақты жұмыспен қамтылып, отбасын асырауға мүмкіндігі болуы маңызды», -деді ол.
2025 жылы Алматы облысында 61,2 мың жаңа жұмыс орнын ашу жоспарланып отыр. Бұл халықтың жұмыспен қамтылуын арттырып, өңірдің экономикалық дамуына серпін бермек.
