Алматы облысында жаңа жұмыс орындарын ашуға бағытталған кешенді шаралар қабылданып жатыр. Бұл туралы облыс әкімі Марат Сұлтанғазиев Үкімет отырысында мәлімдеді. Оның айтуынша, өңірде тіркелген жұмыссыздар саны азайған. Былтырғы көрсеткішпен салыстырғанда жұмыссыздық деңгейі 4,7%-дан 4,6%-ға төмендеген,деп хабарлайды Todayinfo ақпараттық агенттігі.
Әкімнің сөзінше, өңірлік деңгейде жұмыспен қамтуды қамтамасыз ету үшін Өңірлік жұмыс орындарын құру картасы мен инвестициялық жобалар іске асырылуда. Соның ішінде «Жайлы мектеп» жобасы аясында 2820 тұрақты жұмыс орны ашу көзделген. Бұл – тек білім саласындағы емес, құрылыс және қызмет көрсету салаларындағы жұмыс орындарына да оң ықпал етеді.
Алматы облысы бойынша 1,7 трлн теңгеге бағаланған 73 инвестициялық жоба тіркелген. Аталған жобалар толық іске қосылған жағдайда 21 мыңға жуық жаңа жұмыс орны құрылатын болады. Сонымен қатар шағын және орта кәсіпкерлікті дамыту тұжырымдамасы аясында қосымша 450 жұмыс орны ашу жоспарланып отыр.
Әкім кәсіби оқыту бағдарламаларының нәтижесіне де тоқталды. Бүгінде 800-ден астам жұмыссыз кәсіби оқудан өтіп, тұрақты жұмыс орындарына орналасқан. Олардың басым бөлігі кәсіпорын жанындағы оқыту арқылы тәжірибе жинақтаған. Қосымша 5,2 мың адам онлайн-оқытудан өтіп, жаңа мамандықтар бойынша құзыреттерге ие болды.
Жұмыспен қамту бағытында цифрлық жобалар да кеңінен қолданылуда. Студенттер үшін өндірістік тәжірибе орындарын таңдауға және жұмыс берушілерге үміткерлерді автоматты түрде іріктеуге арналған «Өндірістік тәжірибе» платформасы сәтті жұмыс істеуде. Сонымен қатар «Мансап компасы», «Enbek.kz» секілді онлайн-құралдар еңбек нарығының ашықтығын арттыруға бағытталған.
