Отанға деген сүйіспеншілік – ел болашағының кепілі. Патриотизм рухы – әрбір қазақстандықтың жүрегінде елдің бейбіт өмірі мен тұтастығын қорғауға деген асқақ сезім. Қанмен жазылған тарихымыз бен ерлікке толы шежіреміз – бүгінгі ұрпаққа мұра. Батыр бабалар аманатын арқалаған Қарулы Күштеріміз ел бірлігі мен тыныштығын сақтау жолында аянбай қызмет етуде. Оларға деген құрмет – халқымыздың айқын азаматтық ұстанымының көрінісі.Осыған орай, Қонаев қаласының орталық алаңында Отан қорғаушы күніне арналған салтанатты іс-шара өтті, деп хабарлайды Todayinfo ақпараттық агенттігі.
Мерекелік шараларға Алматы облысының әкімі Марат Сұлтанғазиев, Қонаев гарнизонының бастығы, гвардия полковнигі Бейбіт Аманқалиев, Ауған соғысының ардагерлері, өзге де әскери қақтығыстарға қатысқан ардагерлер, Қарулы Күштердің ардагерлері, Қонаев гарнизонының әскери қызметшілері, әскери-патриоттық клубтардың тәрбиеленушілері мен қала тұрғындары қатысты.
Жиналған қауым орталық алаңда орнатылған еңселі сахнадағы кең экраннан Астана қаласындағы әскери парадтың ашылу салтанатын тамашалап, Мемлекет басшысының құттықтауын тікелей эфирде тыңдады. Мемлекет басшысы қазақстандықтарды мерекемен құттықтап, елдегі бейбітшілік пен қауіпсіздікті қамтамасыз етудегі Қарулы Күштердің маңызын атап өтті.
Іс-шара барысында Алматы облысының әкімі Марат Сұлтанғазиев құттықтау сөз сөйледі. Ол Президенттің тапсырмасымен еліміздің Қарулы Күштерінде жүйелі жаңғырту жүргізіліп жатқанын атап өтті:
– Мемлекет басшысының тапсырмасына сәйкес Қазақстан Республикасының Қарулы Күштері жаңғыру үстінде. Олар ұлттық қауіпсіздіктің кепіліне, қоғамның тірегіне айналуда. Біздің Отан қорғаушыларымыз тек шекараны күзетіп қана қоймай, азаматтық келісімді нығайтуға және жастарды отансүйгіштікке тәрбиелеуге зор үлес қосып келеді, – деді өңір басшысы.
Мерекелік шара аясында марапаттау рәсімі өтті. Алматы облысы әкімінің атынан Қонаев гарнизонының және Ұлттық ұланның жиырма шақты әскери қызметшісіне алғыс хаттар табысталды. Марапатталғандар арасында полковник Жеңісжан Байжан, подполковниктер Данияр Маменов пен Берік Елікбаев, гвардия майоры Дархан Жәнсікбаев, майор Нұрлан Ожаров, лейтенант Лаура Бекболатова және сержант Елдос Қарбозов пен өзге де қызметкерлер бар.
Мерекелік көңіл күйді шығармашылық ұжымдардың қатысуымен өткен концерттік бағдарлама жалғастырып, іс-шараға ерекше сән мен жылулық сыйлады.
Осы күні Алматы облысының әкімі Марат Сұлтанғазиев Ұлы Отан соғысының ардагерлері Тәңірберген Толғанбаев пен Фёдор Емельянович Ковалёвке арнайы барып, келе жатқан Жеңістің 80 жылдығымен құттықтады.
Өңір басшысы ардагерлерге мерейтойлық медаль, 5 миллион теңге және Қонаев қаласынан жаңа пәтер кілттерін табыстады. Облыс әкімі соғыс жылдарындағы ерліктері үшін шынайы алғысын білдіріп, ардагерлерге қамқорлық көрсету – мемлекеттік саясаттың басым бағыты екенін атап өтті.
Сонымен қатар, №20030 әскери бөлім аумағында заманауи әскери техника көрмесі ұйымдастырылды. Облыс әкімі бөлімнің материалдық-техникалық базасымен танысып, жеке құраммен әңгімелесіп, бөлімнің жабдықталу деңгейіне жоғары баға берді.
Қонаев қаласында өткен Отан қорғаушы күні бірлік пен ел тыныштығын күзеткен жандарға деген құрмет рухында өтті. Мерекелік шаралар армия мен халық арасындағы байланысты нығайтудың – Қазақстанның орнықты дамуының кепілі екенін тағы бір мәрте көрсетті.
