Мекеме мәліметінше, биыл облыс аумағындағы жол нысандарына 332 шығу жүзеге асырылып, жол-құрылыс жұмыстарының сапасына кешенді сараптама жүргізілді. Нәтижесінде 93 өндірістік ақау анықталды.
Биыл Алматы облысында жергілікті маңызы бар жолдарда пайдаланылып жатқан құрылыс материалдарына жасалған сараптама нәтижесінде сынамалардың 31 пайызы нормативтік талаптарға сай келмейтіні анықталды. Бұл туралы «Жол активтері сапасының ұлттық орталығы» ШЖҚ РМК Алматы облысы бойынша филиалы хабарлады, деп жазады Todayinfo ақпараттық агенттігі.
Сонымен қатар, жол-құрылыс материалдарының 823 сынамасы зертханалық талдаудан өткізілді. Зерттеу нәтижелері бойынша олардың 31 пайызы нормативтік талаптарға сәйкес келмегені белгілі болды. Анықталған ақауларды жою бойынша жауапты мекемелермен бірлескен шаралар қабылданатын болады. Мердігер мекемелерге нормативтік талаптарға сәйкес қайта қалпына келтіру туралы нұсқамалар берілді.
Айта кетейік, мекеме өңірдегі жол-құрылыс жобаларына техникалық бақылау жүргізіп, құрылыс материалдарының сапасына сараптама жасайды. Сонымен қатар, жолдардың жай-күйін анықтау мақсатында диагностика және орташа жөндеу жобаларына ведомстволық сараптама жүргізу жұмыстарын атқарады. Ведомстволық сараптаманың мәліметі бойынша, 2025 жылдың тоғыз айында жоспарланған 85 млн теңгенің орнына 85,046 млн теңгеге 30 келісім-шарт жасалған. Ағымдағы күнге 2025 жылы келіп түскен 105 өтініштің 103 шешімі шығарылды, оның ішінде:
— республикалық маңызы бар а/ж бойынша — 3;
— көше жолдары желісі бойынша– 100.
2025 жылғы 9 айдың қорытындысы бойынша Алматы облысы филиалы республикалық маңызы бар 1078 шақырым 20 жол учаскесінде диагностикалық жұмыстар атқарды. Оның ішінде 677,5 шақырым 15 жол учаскесі күтіп ұстауда, ал 400,5 шақырым 7 жол учаскесі кепілдікте.
Бүгінде кәсіпорын зертханалық қызметті цифрлық форматқа көшіру бағытында жүйелі жұмыс жүргізіп келеді. KazRoadLab атты цифрлық платформа сәтті жұмыс істеп тұр. Инженерлер объектіден алынған сынамаларды QR-код арқылы тіркеп, зертханаға жолдайды. Ал сынақ жабдықтарынан алынған мәліметтер планшетке автоматты түрде түсіп, KazRoadLab жүйесінде нақты уақытта өңделеді. Аталмыш жүйе жол сапасын тиімді бақылауға мүмкіндік беріп, саланы жаңа деңгейге көтереді.
Президент Қасым-Жомарт Тоқаев атап өткендей, жол құрылысы мен сапасын бақылау жүйесін цифрландыру — стратегиялық міндет. Кәсіпорынның бұл жобасы цифрлық трансформация бағытындағы Мемлекет басшысының тапсырмаларына толық сәйкес келеді.
