Былтыр мегаполисте сот орындаушылары алимент өндіру бойынша 22 415 атқарушылық іс жүргізді. Оның ішінде ата-аналық міндетін орындамағаны үшін 159 борышкер әкімшілік жауапқа тартылды. Бұл туралы өңірлік коммуникациялар қызметінде өткен брифингте қалалық Әділет департаментінің басшысы айтты.
Департамент басшысы Балайым Кесебаеваның сөзінше, алимент бойынша борышкерлер балаларын асыраудан бас тартып, нақты қаржылық мүмкіндіктері болса да, табыстары мен мүлкін жасырады.
«Ішкі істер органдарына борышкерлерді қылмыстық жауапкершілікке тарту туралы 133 ұсыныс жолданды. Сонымен қатар, борышкерлерге қарыздарына байланысты елден шығуға 1328 уақытша тыйым салынды», — деді спикер.
Сондай-ақ департаментте жұмыссыз борышкерлерді жұмысқа орналастыру және кәмелетке толмаған балалардың пайдасына алимент өндіріп алу бойынша шаралар қабылдануда.
«Борышкердің тұрақты табысы немесе мүлкі болмаған жағдайда, алиментті өндіріп ала алмайды. Сондықтан жеке сот орындаушылар, әділет органдары жергілікті жұмыспен қамту орталықтарымен бірге борышкерлерді жұмысқа тұрғызу үшін іс-шаралар өткізеді. Биыл 8 жәрмеңке өткізіліп, 780 борышкер жұмысқа орналасқан», – деді Әділет департаментінің басшысы Балайым Кесебаева.
Алматыда әлеуметтік маңызы бар санаттағы істер бойынша барлығы 23 615 атқарушылық іс жүргізілді, алименттен басқа, бұл жалақы, зейнетақы және жәрдемақы өндіріп алу.
«2023 жылы департамент 230 борышкерге қатысты әкімшілік құқық бұзушылық туралы хаттама толтырды, 68 адамға әкімшілік қамауға алу шарасы қолданылды. Борышкерлерді қылмыстық жауапкершілікке тарту туралы 137 ұсыныс жолданды»,- деп атап өтті спикер.
