Алматыға елдің барлық өңірінен және шетелдерден журналистер жиналмақ. Екі жүзге жуық журналист IV Халықаралық түркітілдес журналистер медиа форумына қатысады, деп хабарлайды Todayinfo.
Форум үш күнге жоспарланған. Алғашқы отырыс «Түркі елдеріндегі туризм және PR» тақырыбына арналады. Онда Түркі мемлекеттерінде PR және маркетинг құралдарын тиімді пайдалану арқылы туризм секторының дамуына ықпал ету, мемлекеттік және жекеменшік құрылымдардың туристік PR-ды дамытудағы рөлін нақтылау сынды тақырыптар талқыланады. Туристік маркетинг саласындағы мамандарды оқыту және кәсіби білігін арттыру, жобалар мен бағдарламаларды қаржыландыру, түркі әлемінде туризмді дамытудың бірлескен стратегиясын әзірлеу жолдары көтерілмек.
«IV Халықаралық түркітілдес журналистер медиа форумы – әлемнің түкпір-түкпірінен БАҚ өкілдері жиналып, маңызды мәселелер мен болашақ стратегиялар жайлы кеңесетін тамаша мүмкіндік. Медиа форумда талқыға салынатын тақырыптар туризм саласындағы ортақ жобалар, дәстүрлі журналистика мен әлеуметтік медианың жаңа тенденциялары, жасанды интеллекттің медиаға ықпалы, геосаяси ахуалдың түркі елдеріндегі медиа нарыққа әсері, аймақтық бұқаралық ақпарат құралдарын дамыту жолдары т.б. талқыға салынады. Туристік дестинацияларды жарнамалауда әлеуметтік желілерді пайдалану. Шынайы контент қалыптастыруда блогерлер мен қоғам қайраткерлерімен ынтымақтастық орнату. Туризм — дипломатия құралы.Түркі әлемі елдері арасындағы мәдени және экономикалық байланыстарды туризм арқылы нығайту. Түркі елдерінің қонақжай және қауіпсіз туристік бағыттар ретіндегі имиджін насихаттау», — делінген хабарламада.
БАҚ өкілдері әлемдегі геосаяси жағдай түркітілдес елдердің медиа саласына әсері туралы, санкциялар, ақпарат ағынындағы өзгерістер, жалған ақпараттың өсуімен және тәуелсіз БАҚ-қа қысымның күшеюімен сипатталатын жаңа медиа ландшафтты қалыптастыру жайында білімдерін жетілдіре алады.
Күн тәртібінде төмендегідей тақырыптар көтеріледі:
Медиа кеңістіктің бөлшектенуі: геосаяси ахуалдың ширығуы медиа кеңістіктің бөлшектенуіне әкеп соғады. Салдарынан пропаганда мен манипуляцияға бейім ақпараттық алаңдардың пайда болады. Бұл шынайы ақпаратқа қол жеткізуге кедергі жасайды.
Дезинформацияның артуы: ақпараттық соғыс жағдайында дезинформация мен фейк ақпараттар күшейеді. Бұл журналистерге нақты ақпарат пен «аңыздарды» ажыратуда қиындық келтіреді.
Әлеуметтік желілердің қоғамдағы ықпалының артуы: әлеуметтік желілер бүкіл әлем үшін өте маңызды дереккөзге айналған. Бірақ әлеуметтік желілерде жалған ақпарат жиі тарайды, ақпараттық манипуляция жиі жасалады. Бұл – БАҚ өкілдерінің кәсіби тұрғыда еркін жұмыс істеуіне кедергі.
«Ақпаратты тұтыну әдетінің өзгеруі және болашағы: Жасанды интеллект пен жаңа форматтар. Бүгінде ақпаратты тұтыну әдеті өте тез өзгеріп жатыр. Әлеуметтік желілер, қысқа видеолар, аудиоформаттар сияқты жаңа технологиялардың пайда болуы адамдардың ақпаратқа деген қажеттілігін және оны қабылдау тәсілін түбегейлі өзгертті. Бұл жаңа жағдайда медиа компанияларына жаңа форматтар мен платформаларға бейімделу, контентті монетизациялау және жасанды интеллект сияқты құралдарды тиімді пайдалану сынды үлкен міндеттер жүктеледі. Жасанды интеллект журналистика саласында қандай мүмкіндіктер ашады? VR/AR технологиялары қандай салаларда қолданылады? Контентті монетизациялаудың жаңа әдістері қандай? Әлеуметтік желілердің адамдардың психологиясына әсері қандай? делінген түрлі тақырыптарда ой бөлісіп, журналистер білімдерін көтереді», — деді қордың президенті Нәзия Жоямергенқызы.
Одан бөлек ақпаратты тұтыну әдетінің өзгеруі, контентті монетизациялау, жасанды интеллект медиа кеңістікке ықпалы, БАҚ-та жасанды интеллектті қолданудың этикалық қыры, жасанды интеллектті қолдану кезінде жалған ақпараттарды тарату қаупі, жеке өмірдің құпиялығын бұзу, жұмыс орындарының азаюы сынды мәселелер көтеріледі.
Аймақтық БАҚ-тағы бәсекелестік қабілетін арттыру, табыс көздерін әртараптандыру жолдары да көтерілмек. Форум барысында «Түркітілдес журналистер қоры» ҚҚ Қазақстандағы 7-11 сынып оқушылары арасында ұйымдастырған «Туған жерім – тұғырым» тақырыбындағы жас журналситер байқауының жеңімпаздары марапатталады.
Одан бөлек «Түркітілдес журналистер қоры» ҚҚ-ның «Шеврон» компаниясы серіктестігінде ұйымдастырған «Әлеумет – қоғам айнасы»-2024 байқауы мен «Түркітілдес журналистер қоры» ҚҚ-ның «Шеврон» компаниясы серіктестігінде ұйымдастырған «Еркін сөз»-2024 байқауының жеңімпаздарын марапттау салтанаты өтеді. Қордың 10 жылдығына орай ұйымдастырылған шара барысында БАҚ өкілдеріне арналған семинар-тренингтер ұйымдастырылады.
