2024 жылы қарашаның 11-12 күндері Алматы қаласында түркітілдес елдер арасындағы медиа мен туризм саласындағы ынтымақтастықты нығайту мақсатында IV Халықаралық Түркітілдес журналистер медиа форумы ұйымдастырылды. «TURKTIME: Түркі Елдерінің Медиа және Туризм Бірлігі» тақырыбында өткен форумға түркітілдес елдердің БАҚ өкілдері, сарапшылар, туристік және медиа индустриясындағы мамандар қатысты.
Форумның басты тақырыптары мен маңызды мәселелері
Форум аясында түркі елдеріндегі медиа және туризм индустриясын дамыту мақсатында бірқатар маңызды тақырыптар талқыланды. Шарада туризм саласында PR мен маркетингті қолдану, әлеуметтік медиа мен инфлюенсер-маркетинг, аймақтық БАҚ-тың бәсекеге қабілеттілігін арттыру, сондай-ақ жасанды интеллект пен жаңа форматтардың медиадағы рөлі туралы сөз қозғалды.
I Жалпы отырыс: «Түркі Елдеріндегі Туризм және PR»
Түркі елдеріндегі туризмді дамытуда PR және маркетинг құралдарының рөлін арттыру мәселесі басты тақырып болды. Туризм саласында инфрақұрылымдық инвестицияларды тарту, туристік өнімдерді қалыптастыруда мәдени ерекшеліктерді ескеру қажеттілігі баса айтылды. Әлеуметтік желілер мен инфлюенсерлердің рөлі де туризм саласында жаңа маркетингтік құрал ретінде кеңінен талқыланды.
II Отырыс: «Түркі Елдеріндегі Геосаяси Ахуал және Медиа Нарық»
Қазіргі геосаяси ахуалдың түркітілдес елдердегі медиа нарыққа ықпалы, ақпараттық кеңістіктің бөлшектенуі мен дезинформацияның өсуі талқыланды. Форумға қатысушылар медиасауаттылықты дамыту, тәуелсіз БАҚ-ты қолдау мәселелерін қарастырды.
III Отырыс: «Ақпаратты Тұтынудың Болашағы: Жасанды Интеллект, Жаңа Форматтар»
Ақпараттық технологиялардың қарқынды дамуы мен жасанды интеллекттің медиаға әсері қарастырылды. Қысқа видеолар, аудио форматтар, VR/AR технологиялары мен әлеуметтік желілердің ақпаратты тұтыну тәсілдеріне тигізетін ықпалы сарапталды. Сонымен қатар, медиакомпаниялар үшін контентті монетизациялау әдістері мен жасанды интеллектті қолданудың этикалық мәселелері талқыға түсті.
IV Отырыс: «Аймақтық БАҚ және Бәсекелестік»
Аймақтық БАҚ-ты дамыту жолдары, кадр тапшылығы, экономикалық қиындықтар және аймақтық медиа нарықтың ерекшеліктері талқыланды. Әлеуметтік желілер мен интернет-ресурстардың дәстүрлі БАҚ-қа көрсететін қысымы және бұл саладағы заманауи шешімдер ұсынылды.
Марапаттау салтанаты және байқаулардың жеңімпаздарын құттықтау
Форум аясында «Түркітілдес журналистер қоры» ҚҚ ұйымдастырған «Туған жерім – тұғырым» атты жас журналистер байқауының жеңімпаздары марапатталды. Сондай-ақ «Шеврон» компаниясының қолдауымен өткен «Әлеумет – қоғам айнасы»-2024 және «Еркін сөз»-2024 байқауының жеңімпаздарына сыйлықтар табысталды.
Байқау жеңімпаздары
«Еркін сөз»-2024 байқауының Бас жүлдесін «Үздік телесюжет» аталымында КТК арнасының тілшісі Ұлан Нұрахмет, «Үздік мақала» аталымында «Егемен Қазақстан» газетінің тілшісі Елігімай Төңкер, ал «Сайттағы үздік мақала» аталымында atrpress.kz сайтының тілшісі Амандық Сағынтайұлы иеленді. Жеңімпаздарға диплом, статуэтка және 500 000 теңге көлемінде қаржылай сыйақы табысталды.
Сонымен қатар, «Еркін сөз» байқауының арнайы сыйлықтары төмендегідей иелерін тапты:
- Жолдасбек Дуанабай атындағы сыйлық – Әділет Амангелді
- Сәкен Орынбасарұлы атындағы сыйлық – Бағлан Тұрғанбек
- Бақытгүл Мәкімбай атындағы сыйлық – Эльмира Жүрсінбекқызы
- Айнұр Сыдықова атындағы сыйлық – Мерей Алайдар
«Әлеумет – қоғам айнасы» байқауының бас жүлдесін Жанаргүл Қадырова жеңіп алып, сыйлық ретінде ноутбукқа ие болды, ал екінші орын иегері Нұрбек Дәуренбеков соңғы үлгідегі ұялы телефонмен марапатталды.
БАҚ өкілдеріне арналған семинар-тренингтер
Форумның соңғы күнінде медиа саласының кәсіби мамандарына арналған семинар-тренингтер өтті. Бұл шаралар қатысушыларға тәжірибе алмасу, кәсіби біліктіліктерін арттыру және жаңа тенденциялармен танысуға мүмкіндік берді.
Форум түркітілдес елдер арасында медиа және туризм саласындағы ынтымақтастықты күшейтуге арналған маңызды шара болды.
