Алматыда жаңа экологиялық ережелер енгізілмек. Құжат «Ашық НҚА» порталында қоғамдық талқылауға шығарылды.
Қандай көліктерге шектеу қойылады?
Қала әкімдігінің мәліметінше, Евро-5 стандартынан төмен көліктер орталыққа кірген жағдайда ақы төлеуге міндеттелуі мүмкін. Ал ауа қатты ластанған кезде мұндай көліктердің кіруіне мүлдем тыйым салынуы ықтимал.
Ескі көлікті өткізу мүмкіндігі
Әкімдік қала тұрғындарына ескі көліктерін утилизацияға өткізуге мүмкіндік беруді ұсынып отыр.
«2025 жылғы 1 қыркүйекке дейін Алматы қаласында тіркелген көліктер арнайы бағдарлама аясында сатып алынып, кейін жойылады. Бұл бағдарлама төмен экологиялық сыныптағы көліктерді сатып алуды көздейді. Қаржы көлік иелерінен алынатын төлемдерден, өндірушілердің кеңейтілген міндеттемелері есебінен және жергілікті бюджеттен бөлінеді», – делінген әкімдіктің хабарламасында.
Төлем тәртібі
-
Көліктің аулада немесе тұрақта тұрған уақыты есептелмейді.
-
«Зонаға» кіру ақысы көлік қозғалған күндері ғана төленеді.
-
Бақылау бейнекамералар арқылы жүргізіледі.
Қосымша мәлімет
Редакция әкімдікке ресми сауал жолдап, бағдарлама аясында қанша көліктің сатып алынатынын және утилизация үшін олардың бағасы қалай белгіленетінін сұрады.
Айта кетейік, Алматыдағы экология мәселесі жыл сайын өткір талқыланады. Бұған дейін Мәжіліс депутаты Сергей Пономарев қаланың экологиялық жағдайын жақсарту үшін электромобильдерді кеңінен қолдануды ұсынған еді.
