Мемлекеттік рәміздер күніне орай Алматыда ерекше патриоттық рухтағы салтанатты іс-шара – Мемлекеттік Туды көтеру рәсімі өтті. Рәсімді «Батыр» Президенттік полкінің арнайы тобы «Медеу» спорт кешенінің тау баурайындағы алаңында ұйымдастырды, деп хабарлайды Todayinfo ақпараттық агенттігі.
Шараға Алматы қаласының әкімі Дархан Сатыбалды, мәдениет пен спорт саласының танымал қайраткерлері, қоғам белсенділері, Қазақстан Халқы Ассамблеясының мүшелері, жастар ұйымдарының өкілдері және қала тұрғындары қатысты.
Қазақстан Республикасының Мемлекеттік Туы көкке көтерілер сәтте Б. Байқадамов атындағы мемлекеттік хор капелласы мен Алматы гарнизонының әскери үрлемелі оркестрі Мемлекеттік Әнұранды орындап, көпшілікке рухты сәт сыйлады.
Рәсім аяқталған соң көрермендер назарына қаладағы жетекші шығармашылық ұжымдар мен өнерпаздардың қатысуымен арнайы дайындалған концерттік бағдарлама ұсынылды. Сахнада «Қазақстаным», «Отан», «Туған жер», «Туған жерім тамаша», «Сүйікті елім», «Мен қазақпын», «Ұлы дала», «Қазағым», «Атамекен» сынды патриоттық әндер орындалып, көрермендерді ерекше әсерге бөледі.
Айта кету керек, Мемлекеттік рәміздер күніне арналған мерекелік іс-шаралар қала аудандарында да белсенді түрде өтіп жатыр. Патриоттық шерулер, спорттық жарыстар, көрмелер мен ашық алаңдағы концерттер Алматының барлық бөлігінде ұйымдастырылып, тұрғындарды ел рәміздеріне деген құрметке баулуда.
Мұндай іс-шаралар азаматтардың отаншылдық рухын арттырып, жас ұрпаққа Мемлекеттік рәміздердің маңызын терең ұғындыруға бағытталған.
