Алматыда «Қазақстандық ата-аналар одағы» мен ЛГБТ құқығын қорғайтын «Феминита» ұйымы арасында дау шығып, бұл жағдай полицияның араласуымен аяқталды, деп хабарлайды Тodayinfo ақпараттық порталы.
Оқиға құқық қорғау мектебінің іс-шарасында болған. «Қазақстандық ата-аналар одағының» жетекшісі Бағила Балтабаева бастаған бір топ адам іс-шараға рұқсатсыз кіріп, шараға қатысушылардан есеп беруді талап еткен. Ұйымдастырушылар полиция шақыруға мәжбүр болды.
«Феминита» ұйымының негізін қалаушылардың бірі Жанар Секербаева шақырылмаған қонақтарға орын ұсынып, олардың сұрақтарына жауап беруге дайын екенін айтқан. Алайда топ мүшелері мұны қабылдамай, бәрін видеоға түсіре бастаған.
Бағила Балтабаева ұйымдастырушылардан: «Мұндай мектептерді қандай негізде ашып жатырсыздар? Бұл қаржыны жұмсаудың амалы ма?» деп сұрады. Сонымен қатар ол шараға кәмелет жасына толмағандардың қатысқанын айтып, полицияға арызданды.
Полиция «Феминита» ұйымының өкілдері Жанар Секербаева мен Гүлзат Сержанды бөлімшеге жеткізді. Бұл оқиға қоғамда үлкен пікірталас туғызды. Кейбір әлеуметтік желі қолданушылары ЛГБТ ұйымына қарсы пікірлерін білдіріп, қатаң шара қолдануды талап етті.
«Осыларға заң жоқ па?», «Қамау керек, бұлардың орны түрме» деген жазбалар қалдырылды. Басқа қолданушылар бұл жағдайды «қоғамдық тұрақтылыққа қауіп төндіреді» деп бағалады.
Айта кетейік, бұған дейін Жанар Секербаева «Феминита» ұйымының АҚШ-тың халықаралық даму жөніндегі агенттігі (USAID) тарапынан қаржыландырылмайтынын мәлімдеген болатын. Сондай-ақ ол Дональд Трамп пен Илон Маскты «сексистік және мизогиндік пікір білдіретін тұлғалар» деп сынға алған.
