Сайран көліне қонған аққұтандардың біреуіне оқ атылды. Бұл туралы зооқорғаушы Наталия Сульжик Facebook-тегі парақшасында жазды. Алайда ветеринарлар мен зооқорғаушылар құсты аман алып қала алмады.
«Бұл құс Қызыл кітапқа енген аққұтан болып шықты. Қанатын оқ тесіп өткен. Кеудесі жыртылған. Біз таксимен оны «Айболитке» жеткіздік. Аяқтары да сынған секілді. Бұл жағдай қалай болғанын білмеймін. Байғұс құс қайырымды адамдардың ортасына түсті, олар құсты жылы жерге әкелген соң, маған хабарласты», — деп жазды Наталия Сульжик.
Еске салайық, Қазақстандық фотограф Дмитрий Доценко Сайран көліне қонған аққұтан мен жабайы үйректердің суреттерін жариялаған еді. Ол сондай-ақ балық тістеп тұрған аққұтанды суретке түсірген болатын.
«Бұл — біздің Алатаудың эндемик балығы. Сондықтан мен де өте құнды сурет түсірдім. Ойлап қараңызшы, 2024 жылы екі миллион тұрғыны бар мегаполистің қақ ортасында эндемик нағыз жабайы табиғатты көре аласыз. Бұл — ғажап нәрсе, оны қорғау керек», — деп жазған болатын алматылық фотограф Instagram-дағы парақшасында.
Айта кетейік, 1971 жылдан бері Алматыда алғаш рет Алматы әкімі Ерболат Досаевтың тапсырмасымен Сайран көлі тазартылды. Көлдің түбінен және жағасынан 140 мың текше метрден астам қоқыс пен лай шығарылғанын хабарлағанбыз.
