Соңғы күндері қоғамда кеңінен талқыланған оқиға — Шымкенттегі филармонияның директоры Ғалымжан Ерназаровқа қатысты Наркенже Серікбаеваның кешірім беруі әлеуметтік желіде үлкен резонанс тудырды. Бұл жағдай жайлы оның қызы, Жанерке Серікбаева өзінің әлеуметтік желідегі парақшасында пікір білдіріп, қоғамға үндеу жасады,деп хабарлайды Todayinfo ақпараттық агенттігі.
«Анаммен әрқашан мақтанамын» – Жанерке Серікбаева
Жанеркенің айтуынша, бұл жағдай тек отбасы үшін емес, жалпы қоғам үшін үлкен сынақ болды. «Соңғы үш күндік жағдай бәрімізді селт еткізбей қоймады. Мен анаммен әрқашан мақтанамын. Бұл жолы да ешкім қозғай алмай жүрген қоғамның басты дертін қозғап, ерлік жасады», – деді ол.
Қоғамдық реакция және журналистердің әрекеті
Оқиғаға қатысты кейбір блогерлер мен журналистердің әрекетін Жанерке Серікбаева сынға алды. Оның айтуынша, анасына қолдау білдіріп жатқан жандармен қатар, оны мазаққа айналдырғандар да табылған.
«Біреу жақтады, біреу даттады. Анамды мазаққа айналдырды. Мейлі, біз қашан да мықтымыз. Бұл сынақтан да ойнап-күліп бас көтеріп өтеміз», – деп жазды ол.
Кешірім беру – адамгершіліктің көрінісі
Жанерке Серікбаева белгілі қоғам қайраткерлерінің Наркенже ханымға кешірім беру туралы өтінішпен келгенін айтып өтті. Бастапқыда анасының бұл шешіміне өзі де таң қалғанын жасырмады:
«Мен де анама ренжідім: неге кешірдіңіз, неге соңына дейін бармадыңыз? Бірақ анам: “Саяш, Алладан үлкен емеспіз. Ел ағалары келіп тұрғанда кешірмесек, біздің адамгершілігіміз қайда?” – деп жауап берді», – деді ол.
Еске салайық
Бұған дейін Түркістан облысына қарасты Шәмші Қалдаяқов атындағы филармонияның әншісі Наркенже Серікбаева әлеуметтік желіде видео жариялап, филармония директоры тарапынан анайы ұсыныс естігенін мәлімдеген болатын. Ал филармония директоры Ғалымжан Ерназаров өз жауабында әншінің оған күйе жаққанын айтып, сотқа беретінін мәлімдеген.
