АҚШ президенті Дональд Трамптың Ұлыбританияға жасаған сапары кезінде оның жеке ұшағы әуе апатына ұшырауға аз-ақ қалды, деп хабарлайды Todayinfo Business Insider-ге сілтеме жасап.
Президент арнайы Boeing ұшағымен Лонг-Айленд үстінен ұшып бара жатқанда, Air Force One пен Spirit Airlines жолаушылар рейсі соқтығысу қаупіне тап болған. Оқиға Эндрюс авиабазасынан ұшқаннан кейін шамамен отыз минут өткенде тіркелді.
Авиация қызметінің дерегінше, президенттік Boeing 747 (VC-25A) Форт-Лодердейл – Бостон бағытымен ұшып келе жатқан Airbus A321 ұшағымен бір траекторияға түскен. Диспетчер қауіпті жағдайды байқап, Spirit Airlines экипажына бірнеше мәрте бағытты өзгертуді бұйырған. Тек төртінші ескертуден кейін ғана ұшқыштар жауап беріп, курсты түзеді.
Екі әуе кемесі Лонг-Айленд-Саунд үстінде шамамен бір минут айырмашылықпен өткен. Spirit лайнері президенттік ұшақтан 2,7 шақырым төмен ұшып бара жатқан. Компания өкілдері рейс жоспарланған кесте бойынша орындалып, Бостонға сәтті қонғанын хабарлады.
Сол түні Air Force One Лондон маңындағы Станстед әуежайына қонды. Дональд Трамп АҚШ елшісінің резиденциясына тоқтап, келесі күні король ІІІ Чарльзбен кездесті.
Фото: AP Photo/Бен Кертис
