Республика күні қарсаңында Көкшетау қаласында 500 орынға арналған №10 жаңа жалпы білім беретін мектептің техникалық ашылуы өтті. Білім ошағы ескі апатты мектептің орнында бой көтеріп, «Келешек мектебі» жобасының стандарттарына сәйкес салынды, деп хабарлайды Todayinfo ақпараттық агенттігі.
Оқушыларды мектеп екінші тоқсанда қабылдайтын болады.
Заманауи мектеп сапалы және жайлы білім алуға қажетті барлық жабдықтармен қамтылған. Оқушылардың қауіпсіздігін қамтамасыз ету мақсатында бейнебақылау камералары орнатылып, олар полицияның Жедел басқару орталығына интеграцияланған. Мектеп аумағы үш функционалды аймаққа бөлінген – оқу, спорт және ойын алаңы, сондай-ақ шаруашылық бөлігі.
Нысанды жұмыс сапары барысында Ақмола облысының әкімі Марат Ахметжанов, Оқу-ағарту министрі Жұлдыз Сүлейменова және «Қазцинк» АҚ бас директоры Жанат Жанботин аралап көрді.
Айта кетсек, ескі мектепте бар болғаны 10 оқу кабинеті болып, асхана қарастырылмаған еді. Апатты жағдайда болғандықтан, оқушылар қаладағы өзге мектептерде уақытша білім алуға мәжбүр болды.
Бұл мәселені шешу мақсатында 2023 жылы Ақмола облысы әкімдігі мен «Қазцинк» компаниясы арасында ескі мектептің орнына жаңа ғимарат салу жөнінде меморандумға қол қойылды. Жоба «ҚазЦИНК» ЖШСжеке инвестициялары есебінен жүзеге асырылды.
«Жобаның жүзеге асырылуы – Мемлекет басшысының сапалы біліммен қамтамасыз ету жөніндегі тапсырмасының нәтижесі. Бұл – бизнестің әлеуметтік жауапкершілігінің айқын үлгісі», – деді облыс әкімі Марат Ахметжанов.
Оқу-ағарту министрі Жұлдыз Сүлейменова педагогикалық ұжымды жаңа мектептің ашылуымен құттықтады:
«Бүгінде елімізде 500-ден астам инновациялық мектеп жұмыс істейді, ал бұл мектеп жабдықталуы жағынан солардан кем емес. 2019 жылдан бері Қазақстанда 1 миллионға жуық оқушыға арналған 1300 мектеп салынды. Мемлекет білім беру саласын дамытуға ерекше көңіл бөлуде», – деп атап өтті министр.
«Мектеп ең жоғары сапа стандарттарына сай салынды. Мұнда заманауи құрал-жабдықтармен, робототехникамен жабдықталған 60-тан астам кабинет бар, жаңа спорт залы мен конференц-зал салынды», – деді «Қазцинк» компаниясының бас директоры Жанат Жанботин.
