Мемлекет басшысы Қасым-Жомарт Тоқаев Ақмола облысына жұмыс сапарымен барып, егін жинау науқанының барысын көрді. Президентке биылғы егіс алқабының көлемі 5,5 млн гектарға жетіп, 7 млн тоннадан астам дәнді және 650 мың тонна майлы дақыл жиналатыны баяндалды. Бүгінге дейін 3,6 млн тонна астық бастырылды, орташа өнімділік – 15,4 центнер, деп хабарлайды Todayinfo ақпараттық агенттігі.
Өңірде майлы дақылдар егістігі 2,5 есе артып, 495 мың гектарға жеткен. Президент «Зеренді сақтау өнімдері» ЖШС жұмысымен танысты.
Кеңес барысында Қасым-Жомарт Тоқаев диқандарға табыс тілеп, агроөнеркәсіп саласының маңызын атап өтті.
«Биыл ауа райы қолайлы. Үкімет қолдау көрсетіп отыр. Жанар-жағармаймен қамтамасыз етіп, алдын ала жеңілдетілген несие беруде. Астық түсімі жақсы болады деп ойлаймыз. Баршаңызға табыс тілеймін», — деді президент.
Президент ауыл шаруашылығында өңдеуді дамытудың қажеттілігін айтты.
«Былтыр ауыл шаруашылығындағы өнім көлемі 8 триллион 250 миллиард теңгені құрады. Бұл көп те, аз да емес… Яғни экономикадағы ауыл шаруашылығының үлесін арттыру қажет. Ауыл шаруашылығы – біз үшін табысты сала. 12 миллион тонна бидай экспорттау әлеуеті – өте жоғары көрсеткіш», — деді Тоқаев.
Мемлекет басшысы агротехнологияны қолдану тиімділігін атап өтті.
«Жыл сайын егін жинау науқанында сіздердің кәсіби біліктеріңіз сыналады. Сіздер табиғат тосын мінез танытса да жоғары нәтижеге қол жеткізіп жүрсіздер. Мемлекет диқандарды қолдау үшін бұрын-соңды болмаған шараларды қолға алып жатыр. Биыл менің тапсырмаммен ауыл шаруашылығына жеңілдетілген несие беру үшін 1 триллион теңге бөлінді. Бұл – рекордтық көрсеткіш», — деді мемлекет басшысы.
Сапар аясында Президент ауыл шаруашылығы өнімдерінің көрмесін аралап, аймақ диқандарына алғысын білдірді.
Фото: Ақорда
