Өңірде электрмен жабдықтау жүйелері белсенді түрде жаңартылып жатыр. Бұл жұмыстардың нәтижесінде электр энергиясы тапшылығы жойылып, 30 мың тұрғын мен туристік аймақтардағы 3 мың абонент сапалы электр қуатымен қамтамасыз етілді,деп хабарлайды Todayinfo ақпараттық агенттігі.
Өткен жылы «Қоянды Оңтүстік» және «Боровская» қосалқы станциялары пайдалануға берілді. Биыл да халықты электрмен жабдықтау сапасын арттыру жұмыстары жалғасуда, тиісті қаржыландыру қарастырылған.
«Біз электрмен жабдықтау сапасын кезең-кезеңімен жақсартып келеміз. Қала мен ауыл тұрғындары да сенімді энергияға қол жеткізгені маңызды», – деді Ақмола облысы энергетика және ТКШ басқармасының басшысы Бақтыбек Жапаев.
Осы жылы да ауқымды жұмыстар жүргізілуде: Қараөткел, Қоянды, Қаражар және Ақмола елді мекендерінде жаңа желілер салынып жатыр. Аршалы ауданының Қостомар ауылындағы құрылыс келесі жылы аяқталады. Бұл жобалар шамамен 9 мың абонентті қосуға және ескі желілерге түсетін жүктемені азайтуға мүмкіндік береді.
«Жаңа желілерді кеңейтумен қатар, қолданыстағы инфрақұрылымның сенімділігіне де мұқият қараймыз. Біздің мақсатымыз – тұрғындардың электр қуатының ажыратылуы мен желілердегі іркілістерге тап болмауы», – деп қосты Жапаев.
Бұдан бөлек, биыл 7 жоба бойынша құрылыс жоспарланған. Оның екеуі – Бурабай ауданындағы Наурызбай батыр және Атамекен ауылдарында іске асырылып, 9 шақырымдық жаңа жарық шамдары орнатылды.
Жыл соңына дейін тағы бірнеше ауданда жаңа көше шамдары пайда болады. Бұл көшелердің қауіпсіздігін арттырып, облыс тұрғындарының өмір сүру жағдайын жақсартпақ.
