Көкшетауда Қазақстандық отбасы күніне орай өткен салтанатты шарада Ақмола облысының ең үлгілі әулеттері марапатталды. «Мерейлі отбасы – 2025» ұлттық байқауының облыстық кезеңінде Целиноград ауданынан келген Мекебаевтар әулеті гран-при иегері атанды, деп хабарлайды Todayinfo ақпараттық агенттігі.
Биылғы байқауға Ақмола облысынан 100-ге жуық отбасы өтінім беріп, комиссия шешімімен 7 үздік әулет анықталды. Жеңімпаздар марапатталып, ақшалай сыйлықтар мен сертификаттарға ие болды. Байқаудың бас жүлдесін Целиноград ауданынан келген Мекебаевтар әулеті иеленіп, 500 мың теңге мен республикалық кезеңге жолдамаға қол жеткізді.
Сонымен қатар ынталандыру сыйлықтарына Аршалы ауданынан Жолпаттар, Қорғалжын ауданынан Тұрсыновтар және Атбасар ауданынан Қабылдиновтер әулеттері ие болды. Жеңімпаз атанған Мекебаевтар әулетін 77 жастағы қария, жезтаңдай әнші әрі ақын, жазушы Мекебай Кәкенұлы бастап келді. Ол өз сөзінде отбасындағы дәстүрлерімен бөлісті.
«Отбасында асты батасыз бастамаймыз, батасыз астан тұрмаймыз. Ұлттық тәрбие – ұрпаққа мирас. Ұлды атқа мінгізу – жай ғана серуен емес, ер-азамат ретінде мойындаудың ерекше рәсімі. Бұл – жауапкершілік пен еркіндікке баулитын дәстүр», – деді ол.
Салтанат сарайында ұйымдастырылған марапаттау рәсіміне облыс әкімінің орынбасары Досұлан Айтбаев, байқау комиссиясының мүшелері және отбасы институтын дамытуға атсалысып жүрген қоғам өкілдері қатысты.
«Мемлекет үшін отбасы әрдайым ұрпақтар сабақтастығын жалғайтын берік институт болып табылады. Президентіміз Қасым-Жомарт Кемелұлы Тоқаев «Отбасы институты – еңбекқорлық, білімпаздық, тілектестік сынды қасиеттерді дәріптеу арқылы ұлттың жаңа сапасын қалыптастыруға өлшеусіз үлес қосады» деп атап өткен болатын», – деді әкім орынбасары.
Мерекелік шара барысында Мекебаевтар әулеті өздерінің қолөнер бұйымдарынан көрме ұйымдастырып, көрермен назарына шығармашылық өнерін ұсынды. Концерттік бағдарламаға ұласқан кеш барлық қатысушыларға көтеріңкі көңіл-күй сыйлады.
«Мерейлі отбасы» байқауы – отбасы мен некенің оң бейнесін насихаттап, ұлттық құндылықтарды жаңғыртуға бағытталған дәстүрлі жоба. Енді Мекебаевтар әулеті республикалық кезеңде Ақмола облысының намысын қорғайтын болады.
