2025 жылғы 19 маусымда Көкшетау қаласында мемлекеттік тілді жеңіл әрі өздігінен үйренуге бағытталған ІТ жобаларды анықтайтын облыстық «QAZ TECH» байқауы өтті, деп хабарлайды Todayinfo.kz.
Байқаудың мақсаты – заманауи технологиялардың көмегімен қазақ тілін өздігінен меңгертудің тың идеяларын анықтау, түрлі бағдарламалық жасақтамаларды әзірлеу, сол арқылы мемлекеттік тілде сөйлеушілер санын арттыру, Қазақстан Республикасында тіл саясатын дамытудың 2023-2029 жылдарға арналған тұжырымдамасын іске асыру.
Облыстық байқауда Көкшетау, Степногорск қалаларының және Бурабай ауданының жоғары және орта оқу орындарындағы ІТ саласының қызметкерлері мен студент-бағдарламашылардан құралған командалар бақтарын сынады.
Ережеге сәйкес, мемлекеттік тілдің қолданылу аясын арттыруға бағытталған жаңа ІТ жобалар байқауға ұсынылды. Жобалар іске қосылмаған, ешқандай БАҚ беттерінде (әлеуметтік желілерді қоса алғанда) жарияланбаған болуы тиіс. Сайыс барысында жобалардың өзектілігі, нәтижелілігі мен қолжетімді болуы бағаланды.
«Бүгінгі байқауға қатысушылар жақсы дайындықпен келгені көрініп тұр. Жалпы ІТ саласы шығармашылық пен техникалық дағдыларды біріктіретін күрделі сала. Осындай байқаулардың жастарға пайдасы өте зор, өйткені олардың бәсекеге қабілеттілігі арта түседі. Нәтижесінде қазақ тілін үйренушілердің саны да көбейеді, тілді меңгертетін технологиялар да әртүрлі бағытта болады», – деп бөлісті қазылар алқасының төрайымы, техника ғылымдарының магистрі Л.Шегирова.
Конкурс қорытындысы бойынша ІІІ орынды Көкшетау қ. жоғары техникалық колледжі студенттерінің командасы Ә.Қожахмет, В.Волков, А.Григорьев, ІІ орынды Ш.Уәлиханов атындағы Көкшетау университеті командасының студенттері Д.Қаппасов, Ж.Айтмұрат, Н.Кәдірбай, І орынды Степногорск қ. тау-кен техникалық колледжінің студенті Д.Шуган, ал Бас жүлдені Ш.Уәлиханов атындағы Көкшетау университетінің жанындағы көпсалалы колледждің студенті Д.Болат иеленді.
«Тілді үйренуде қазір әртүрлі қосымшалар сұранысқа ие. Бүгінгі байқауға жетекшіммен қазақ тілін үйренуге бағытталған сайт әзірледік. Сайтта тіл үйренушілерге арналған түрлі қызықты жаттығулар, тапсырмалар жинақталған. Алдағы уақытта сайтты жетілдіріп, диплом жұмысымның практикалық бөлімінде қолдану жоспарымызда бар», – дейді байқаудың І орын жеңімпазы Диана Мейрамқызы.
Байқау қорытындысы бойынша барлық қатысушыларға тиісті дипломдар мен алғыс хаттар және бағалы сыйлықтар табыс етілді.
