АҚШ Сауда министрлігі 2025 жылғы мамырда қазақстандық ферросилиций экспорттаушыларына қарсы түпкілікті өтемақы баждарын бекітті. Ең қатаң шаралар «ТНК Қазхром» АҚ мен оның трейдері TELF AG-ке қолданылды — олар үшін тариф мөлшері 265,53% болып белгіленді.
Ферросилицийге қатысты өтемақылық тергеу 2024 жылдың сәуірінде АҚШ компаниялары CC Metals and Alloys, LLC және Ferroglobe USA, Inc. шағымы бойынша басталды. Олар шетелдік жеткізушілерді «әділетсіз сауда тәжірибесін» қолданды деп айыптаған. Бастапқыда 240% көлемінде баж енгізу ұсынылған еді.
Қазақстандық тараптың дәлелдері, келіссөздер және АҚШ Сауда министрлігі өкілдерінің сапары нәтижесінде, TОО YDD Corporation секілді отандық өндірушілер үшін тариф 16,82% деңгейінде бекітілді. Алайда «Қазхром» мен оның трейдері ең жоғарғы мөлшерлемеге ілікті.
Сонымен қатар, АҚШ президентінің жарлығына сәйкес, 2025 жылғы 7 тамыздан бастап Қазақстаннан жеткізілетін бірқатар тауарларға, оның ішінде ферросилицийге, қосымша кедендік баж 10%-дан 25%-ға көтерілді.
Қазақстан Сауда министрлігінің дерегінше, 2025 жылдың алғашқы бес айында АҚШ-қа ферросилиций экспорты 1,5 мың тонна болды (жалпы көлемнің 3,5%-ы). Бұл 2024 жылдың дәл осы кезеңімен салыстырғанда 2,3 есе аз.
Бұған дейін АҚШ тарифіне іліккен қазақстандық тауарлардың тізімі жарияланған болатын.
