Мюнхендегі Қауіпсіздік конференциясы аясында 14 ақпанда АҚШ, Ресей және Украина өкілдері Мәскеу мен Киев арасындағы қақтығысты реттеу тақырыбында байланыс орнатады. Бұл туралы Ақ үйде журналистерге АҚШ президенті Дональд Трамп мәлімдеді, деп хабарлайды Тodayinfo ақпараттық порталы.
«Ресей біздің адамдармен бірге сол жерде болады, ал Украина да шақырылған. Бірақ нақты кімдердің болатынын білмеймін. Әртүрлі елдерден жоғары деңгейдегі лауазымды тұлғалар қатысады», – деді Трамп.
Мюнхендегі конференция 14-16 ақпан аралығында өтеді.
Euronews мәліметінше, АҚШ-тың вице-президенті Джей Ди Вэнс пен мемлекеттік хатшы Марко Рубио осы конференция аясында Украина президенті Владимир Зеленскиймен кездеседі. Олар Дональд Трамптың Мәскеу мен Киевке келіссөздер бастау жөніндегі үндеуін талқылайды.
