Фото: sharer.com
Threads желісінде танымал әнші Қанат Үмбетовке қатысты даулы жазба тарады. Желі қолданушысы kazbekkyzy_a эстрада жұлдызын анасының 28 маусымда өткен мерейтойына шақырғанын, бірақ әншінің уәделескен күні келмегенін айтты, деп хабарлайды Todayinfo.kz ақпарат агенттігі.
«Әнші Қанат Үмбетовті шақырдық. Ол қайын ағамыздың досы болғандықтан, алдын ала 100 пайыз төлем сұрады. Біз де алдын ала аудардық. Той болатын күні телефон тұтқасын көтермеді. Кейін парақшасын қарап едік, басқа мейрамханада тойда жүргенін көрдік. Екі айдан асты, әлі ақшаны қайтарған жоқ. Көмекшілері де ештеңе білмейміз дейді. Осындай жағдайға түспеңіздер! Қайын ағам әлі іздеп жүр», – деп жазды автор.
Өнер иесінің арт-директоры Азамат бұл жағдайға қатысты пікір білдірді:
«Сіз Қаскелең қаласында болған тойды айтып тұрсыз-ау. Қанаттың екі менеджері бар, барлық тапсырысты біз қабылдаймыз. Бірақ бұл жолы Қанатқа таныстары тікелей шыққан, бізге ескертпеген. Біз ешкімнен алдын ала төлем алған жоқпыз. Қанат қазір біздің де телефонымызды көтермей жатыр. Қанша ақша төлегенін де білмейміз», – деді ол.
Әншінің бұл әрекетін желі қолданушылары қызу талқылап, сынға алды:
-
«Әншілерді мүлдем шақырмау керек»
-
«Қырғын ақша алады да, халықты алдайды»
-
«Телефон нөмірін беріңіз, бәріміз жазайық»
-
«Ақшасын қайтарсын!»
Даудың қалай аяқталары әзірге белгісіз.
