Фото: Видеодан скрин
Ақтаудың 9А ықшамауданында қайғылы оқиға болды, суға тұншығып қалған екі жасөспірімнің біреуі көз жұмды, деп хабарлайды Todayinfo агенттігі Lada.kz-ке сілтеме жасап.
Маңғыстау облыстық ТЖД дерегінше, оқиға 9 маусым күні сағат 17:40 шамасында қаладағы «I Love Aktau» шағын сәулет нысанының жанында болған. 2011 жылы туған екі мектеп оқушысы суға бата бастаған. Оларды куәгерлер алып шыққан.
Құтқарушылардың мәліметінше, балалар рұқсат етілмеген жерде шомылған.
«Бір жасөспірім оқиға орнында көз жұмды. Екіншісі ауыр хәлде ауруханаға жеткізілді», – деп хабарлады ТЖД өкілдері.
12 құтқарушы маман, 5 арнайы техника, 1 жүзу құралы, 2 жедел жәрдем бригадасы, 12 полиция қызметкері, 6 патрульдік көлік жіберілген.
ТЖД ата-аналарға ескерту жасады
ТЖД өкілдері ата-аналар мен тұрғындарды балаларды қараусыз қалдырмауға және тек арнайы жабдықталған жағажайларда шомылуға кеңес берді. Су айдындарындағы қауіпсіздік ережелерін сақтау қайғылы жағдайлардың алдын алудың басты кепілі екенін еске салды.
