Ақтау қаласында жол ережесін өрескел бұзып, полицияның тоқтау талабына бағынбаған жүк көлігінің жүргізушісі әрең ұсталды,деп хабарлайды Todayinfo ақпараттық агенттігі.
Оқиға 29 шілде күні сағат 02:00 шамасында болған. Ақтауға қарасты Промзона елді мекенінде «Мирас» жасағы жүк көлігін тоқтатпақ болғанымен, жүргізуші заңды талапқа бағынбай, қалаға қарай қаша жөнелген.
Полиция қызметкерлері жүк көлігінің бағыты бойынша жаяу жүргіншілер мен басқа жүргізушілерді ескертіп, ықтимал апаттың алдын алды. Қауіпке қарамастан, жүк көлігінің жүргізушісі жол қозғалысы ережесін бірнеше рет бұзған.
Құқық қорғау органдары көлікті тоқтату үшін дөңгелек тесетін арнайы темір шиптар («кірпі») қолданды. Соған қарамастан, жүргізуші қозғалысын жалғастырып, тек 14-шағынауданда тоқтады.
Полиция дерегінше, жол-көлік оқиғасы тіркелмеген.
Кейін анықталғандай, жүк көлігінің жүргізушісі алкогольдік масаң күйде болған.
«Қазіргі кезде ҚР Әкімшілік құқық бұзушылық туралы кодексіне сәйкес хаттамалар толтырылып, іс сотқа жолданды. Көлік арнайы айып тұрағына қойылды», – делінген Ақтау қалалық полиция мәлімдемесінде.
Посмотреть эту публикацию в Instagram
