Ақтау қаласының прокуратурасы пробация қызметінде есепте тұрған сотталғандардың жазаны орындау тәртібін тексеру барысында бірқатар заңбұзушылықтарды анықтады, деп хабарлайды Todayinfo.
Прокуратураның мәліметінше, пробация қызметінде тіркелген 87 адамға қатысты қоғамдық жұмыс түріндегі жаза орындалу барысы зерттелген. Алайда тексеріс нәтижесінде 8 сотталғанның қоғамдық жұмысқа нақты қатыспағаны белгілі болды. Соған қарамастан, есепке алу табелдерінде бұл азаматтар жұмысты толық орындады деп көрсетілген.
«Бұл жағдай қала әкімдігіне қарасты құрылымдық бөлімшенің қоғамдық жұмыстардың орындалуын тиісті деңгейде бақыламауы салдарынан орын алған», – делінген прокуратураның ресми хабарламасында.
Тексеру нәтижесінде Ақтау қаласының әкімдігіне қарасты «Тұрғын үй-коммуналдық шаруашылық» бөлімінің басшысы тәртіптік жазаға тартылды. Қадағалау органы бұл әрекетті жазалардың тиімді орындалуын қамтамасыз етпеу ретінде бағалап отыр.
Ақтау қаласы прокуратурасы пробация қызметінің жұмысын және жергілікті атқарушы органдар тарапынан жүктелген міндеттердің орындалуын бақылау жұмыстары жалғасатынын мәлімдеді.
