Қара жәшік деректері зерттелуде
Қазақстан Республикасының Көлік министрлігі Ақтау маңында орын алған әуе апатының қара жәшіктерінен алынған деректерді зерттеу жұмыстары басталғанын хабарлады. Бұл туралы Todayinfo.kz сайты мәлімдейді.
Министрліктің хабарлауынша, бірнеше күн ішінде әуе апатын зерттеу жөніндегі комиссия мүшелері Астанаға жеткізіледі. Олар қара жәшіктерден алынған ақпаратты дереу талдай бастайды.
Қара жәшіктер деректерін талдау барысы
Embraer 190 ұшағының қара жәшіктерінен алынған ұшу деректері Бразилиядағы авиациялық оқиғаларды зерттеу орталығында (CENIPA) талданып, Қазақстанның тиісті органдарына тапсырылды. Талдау нәтижелері бойынша қорытынды есепті жариялау Қазақстанның тергеу органдарының құзыретінде.
Апат туралы қысқаша ақпарат
2024 жылдың 25 желтоқсанында Ақтау әуежайынан үш шақырым қашықтықта Azerbaijan Airlines (AZAL) әуе компаниясына тиесілі Embraer 190 ұшағы апатқа ұшырады. Баку – Грозный бағыты бойынша ұшып бара жатқан ұшақ шұғыл қонуға әрекет жасаған кезде құлаған. Ұшақта 62 жолаушы мен 5 экипаж мүшесі болған.
Тергеу және болжамдар
Халықаралық азаматтық авиация ұйымы (ИКАО) конвенциясына сәйкес, тергеуді Қазақстан басқарады. Оған Азербайжан, Ресей және халықаралық сарапшылар, сондай-ақ Embraer компаниясының өкілдері қатысуда.
Азербайжандық және халықаралық БАҚ апаттың себебі ретінде Ресейдің әуе қорғаныс жүйесінің ықтимал әсерін қарастыруда. 28 желтоқсан күні Ресей президенті Владимир Путин бұл оқиға үшін кешірім сұрап, зардап шеккендердің отбасыларына көңіл айтты.
29 желтоқсан күні Азербайжан президенті Ильхам Алиев Ресейден ресми түрде кешірім сұрауды, кінәлілерді жауапкершілікке тартуды және өтемақы төлеуді талап етті.
Ұшақтағы жолаушылардың азаматтығы
ҚР ТЖМ мәліметі бойынша, ұшақта 62 жолаушы және 5 экипаж мүшесі болған:
- 42 азамат – Азербайжан;
- 16 азамат – Ресей;
- 6 азамат – Қазақстан;
- 3 азамат – Қырғызстан.
Қазіргі мәлімет бойынша, 29 адам аман қалған, бірақ кейбіреулерінің жағдайы ауыр. Өкінішке орай, қазақстандық жолаушылар арасында тірі қалғандар жоқ.
Қайтыс болған қазақстандықтар:
- Төлесінов Сандибек Екібаевич, 1988 ж. т., Маңғыстау облысының тумасы, Жаңаөзен тұрғыны.
- Жұмағұлов Бауыржан Жұмабайұлы, 1985 ж. т., Маңғыстау облысының тумасы, Жаңаөзен тұрғыны.
- Махсудова Галина Растамбековна, 1978 ж. т., Маңғыстау облысының тумасы, Ақтау тұрғыны.
- Шаймерденова Гаухар Жұмағатовна, 1975 ж. т., Алматы тумасы, Астана тұрғыны.
- Жұмағат Эльдар (Гаухар Шаймерденованың ұлы), 2013 ж. т., Астана тұрғыны.
- Жұтаева Салима Аманжолқызы, 1995 ж. т., Қостанай облысының тумасы.
