Түркі елінің рухани астанасы Түркістан қаласында халықаралық қарттар күніне орай, ұрпақтар сабақтастығын нығайту, ұлттық салт-дәстүр, әдет-ғұрыптарын насихаттау, салауатты өмір салтын ұстануға тәрбиелеу, спортқа деген қызығушылығын арттыру, қазынаға толы ата-әже өнегесін кейінгі ұрпаққа үлгі ету мақсатында ұйымдастырылған «Қазыналы қарттарым» спорттық жарыс өтті, — деп хабарлайды Todayinfo.kz ақпараттық агенттігі.
Түркістан қаласы әкімдігінің баспасөз қызметінің мәлімдеуінше жарысқа қатысуға дойбыдан 5 үміткер, шахматтан 7 үміткер өтінім білдірген.
Ата – бабамыздан қалған ұлттық салт-дәстүр, әдет-ғұрыптарын насихаттау, салауатты өмір салтын ұстануға тәрбиелеу, спортқа деген қызығушылығын арттыру мақсатында ұйымдастырылған жарысқа қазылар алқасының құрамы бекітілді. Ол, Бейсембаев Бақытжан Жармаханұлы — «Бітімгер» медиаторлардың қоғамдық бірлестігінің басшысы, Түркістан облыстық Қоғамдық кеңес мүшесі, Қазақстан халқы Ассамблеясының мүшесі және облыстық Медиация кеңесінің төрағасы, Түркістан қаласының Құрметті азаматы.
«Этно ауыл» аумағында ұйымдастырылған «Қазыналы қарттарым» спорттық жарысында ардагерлер спорт түрлері дойбы мен шахматтан өз кезектерімен жарысып, өнерлерін көрсетті. Көне көз қариялардың спорттық өнерлерін арнайы тағайындалған қазылар алқасы құрамы саралап, бағалады.
Жарыстың қорытындысына келер болсақ:
ДОЙБЫДАН:
— Отырар секторынан — Пәйзіұлы Хамза — І орын.
— ІІ орынды Яссы секторынан — Дүйсекбай Сенбек, Яссы секторынан Файзиев Ержан Хамзаұлы аталарымыз алса,
— ІІІ орынға Баймұрзаев Ералы мен Сихимов Шауғар секторынан Ғалымжан Бахытжанұлы иеленді.
ШАХМАТТАН:
— І орын — Отырар секторынан – Жарқынбек Ерсін;
— ІІ орынды — Каликулов Зауіржан мен Отырар секторынан Аханов Назарбек алса,
— ІІІ орынға Досыбекова Мария Сартайқызы мен Сауран секторынан Атабаев Набихан иеленді.
Халықаралық қарттар күніне орай «Қазыналы қарттарым» спорттық жарысы өз мәресіне жетіп, барлық жүлдегерлер қаржылай сияпатпен және қала әкімінің дипломымен марапатталды. Өнерлі аталарымызды бағалаған қазылар алқасының құрамы да марапатталды. Этно ауылда өткен байқауды тамашалауға қала тұрғындары, әжелер алқасының мүшелері мен қаламыздың зиялы қауым өкілдері қатысты. Сайысқа келген қатысушылар мен көрермендер алғыстарын білдіріп, көтеріңкі көңіл күймен тарасты.
Айта кетейік, бүгінгі таңда Түркістан қаласында 16 224 зейнеткерлер тұрады. Қазақстан Республикасының Еңбек және халықты әлеуметтік қорғау министрінің 2021 жылдың 22 ақпанындағы «Аға буын азаматтарының жағдайын жақсарту жөніндегі 2025 жылға дейінгі «Белсенді ұзақ өмір сүру» іс-шаралар жоспарын бекіту туралы №47 бұйрығына сәйкес өңірлерде «Белсенді ұзақ өмір» орталықтарын ашу тапсырылған. Ардагерлермен мен зейнеткерлерге қамқорлық жасау, қарт адамдардың өмір сүру сапасын жақсарту, оның ішінде жүйелі бос уақытты ұйымдастыру, оларды қоғамның белсенді өміріне тарту мемлекетіміздің саясатының басым бағыттарының бірі болып табылады.
