Астана қаласында Қазақстан Республикасының Ұлттық архиві Қазақстан Республикасы Мәдениет және ақпарат министрлігінің қолдауымен «Архив-2025: архивтегі аманат» атты республикалық ғылыми-тәжірибелік конференциясын өткізді, деп хабарлайды Todayinfo.
Конференцияның мақсаты 2020-2025 жылдарға арналған «Архив-2025» жобасын іске асыру жөніндегі кешенді іс-шаралар жоспарын жүзеге асырудың қорытындылау.
Жиын аясында Архив, құжаттама және кітап ісі комитетінің төрағасы Рустам Али ҚР Мәдениет және ақпарат министрі А.Балаеваның құттықтау хатын оқыды.
«Сіздер еліміздің тарихи-мәдени мұрасы мен баға жетпес жәдігерлерін сақтау, оларды ғылыми айналымға енгізу, келешек ұрпаққа жеткізу жолында қажырлы қызмет етіп келесіздер. Елдің зияткерлік меншігі мен мәдени игілігінің тұтастығын сақтап, архив ісін жетілдіріп, ауқымды жобаларды жүзеге асырғандарыңыз үшін алғысым шексіз»,-деді министр өз құттықтауында.
Іс-шара барысында «Архив-2025» бағдарламасы бойынша атқарылған жұмыстар мен қол жеткізілген нәтижелер талқыланып, бейнероликтер мен көрме материалдары ұсынылды. Сонымен қатар архив мекемелерінің материалдық-техникалық базасын жаңғырту, цифрлық жүйеге енгізу бағытында атқарылған жұмыстар таныстырылды.
2020 жылдан бастау алған жоба аясында республикалық архивтердің ғылыми-экспедициялары Германия, Польша, Чехия, Түркия, Франция, Венгрия, Үндістан, Иран, Египет, Қырғызстан, Ресей Федерациясы, Әзірбайжан, Беларусь, Катар сынды 14 елде анықтау жұмыстарын жүргізді. Ғылыми зерттеу нәтижесінде 913-1990 жылдар аралығындағы Қазақстан тарихына қатысты 7000-нан аса құнды құжаттар жинақталып, ғылыми айналымға енгізілді.
Көне құжаттар қатарында 918 жылы Темір ханның Сайбек ханға елші жіберіп Бұрындықпен мәмілеге келуі туралы деректер және Шығыс Түркістан халқының тәуелсіздігімен бостандығы үшін күрескен Оспан батыр туралы Нұрғожай батырдың естеліктері болса, мәдениет, ғылым, түрлі салалар мен қазақтың тұрмыс-тіршілігі мен салт-дәстүріне қатысты құжаттардың маңызы зор. Соның ішінде қазақтың күйші қызы Дина Нұрпейісованың қатысуымен түсірілген қысқа бейнесюжет, биші Шара Жиенқұлова жайлы деректер архив қорына енді.
Конференция жұмысына ҚР Парламенті Мәжілісінің депутаттары, ҚР Мәдениет және ақпарат министрлігінің өкілдері, республикалық және облыстық архивтердің басшылары, архив саласының мамандары, тарихшы-ғалымдар қатысты.
