Рухани астана — Түркістан қаласында тұрғындардың мәдени өмірін жандандыру, бос уақытын мазмұнды өткізуге мүмкіндік жасау және ұлттық өнерді кеңінен насихаттау мақсатында ерекше форматтағы мәдени шара ұйымдастырылды. Ашық аспан астында өткен бұл концерттік кеш «Түркістан әуендері» атауымен өтті және қала жұртшылығына көтеріңкі көңіл-күй мен рухани серпіліс сыйлады.
Түркістан қаласы әкімдігінің қолдауымен, Мәдениет үйінің шығармашылық ұжымы ұйымдастырған бұл кеште қала тұрғындары мен қонақтары өнердің әр алуан түрін тамашалау мүмкіндігіне ие болды. Кешке арнайы дайындалған сахна қала орталығындағы көрнекті алаңдардың біріне орнатылып, ерекше сән-салтанатпен безендірілді. Бұл кештің басты ерекшелігі — еркін форматта, ашық алаңда ұйымдастырылуы. Шараның басты мақсаты — халық пен өнерді жақындату, мәдениетті қолжетімді ету.
Концерт барысында Түркістан жұртшылығына жақсы таныс, жергілікті танымал әншілер мен жас таланттар сахна төріне шығып, қазақтың халық әндерін, заманауи туындыларды әуелете шырқады. Кейбір әндер көрермендермен бірге орындалып, ерекше жылы, достық атмосфера қалыптасты. Әрбір нөмірге көрермендердің ықыласпен қол соғуы — бұл кештің көптің көңілінен шыққанын аңғартты.
Сонымен қатар, кештің тағы бір жарқын сәті — Яссы халықтық би ансамблінің әсерлі өнер көрсетуі болды. Ансамбльдің орындауындағы қазақтың ұлттық билері — салт-дәстүр мен рухани мұраны дәріптесе, заманауи би қойылымдары — жастарға арналған тың серпін сыйлады. Ансамбльдің би композициялары сахна көркемдігін айшықтай түсіп, көрермендердің ыстық ықыласына бөленді.
Мұндай мәдени кештер Түркістан қаласының өнер мен руханиятқа ерекше ден қоятынын, мәдениет саласын дамыту жолында жүйелі жұмыс атқарылып жатқанын дәлелдейді. Бұл — қала халқының рухани сұранысына берілген лайықты жауап әрі шығармашылық әлеуетті танытудың бір көрінісі. Ашық аспан астында өткен кеш көпшіліктің оң бағасына ие болып, келешекте мұндай жобалардың тұрақты түрде ұйымдастырылуы көзделіп отыр.
«Түркістан әуендері» кеші — қала тұрғындарының жүрегіне жол тапқан, ұлттық болмыс пен заманауи өнерді ұштастырған мәдени бастаманың сәтті үлгісі ретінде есте қалды.
