Фото: semeynews.kz
Астананың Промышленный тұрғын алабында силикат кірпіш өндіретін зауыт 10 жылдан астам уақыт бойы жұмыс істеп келеді. Қауіпті өндіріс тұрғындардың денсаулығына кері әсерін тигізгені сонша — қала әкімдігі сот арқылы зауытты көшіруді талап етті, деп хабарлайды Todayinfo.kz ақпарат агенттігі.
Бүгінде Промышленныйда шамамен 30 мың адам тұрады. Олар жылдар бойы силикат кірпіш өндірісі кезінде ауаға таралатын зиянды шаңды жұтып келген. Аудан үстінде тұрақты тұман, шикізаттың өткір иісі тұрып алады.
Мамандардың айтуынша, бұл шаңның құрамында кварц бөлшектері және басқа да қауіпті қосылыстар болуы мүмкін (мысалы, күкірт диоксиді, көміртек оксидтері, фторидтер). Мұндай бөлшектер тыныс жолдарын тітіркендіріп, аллергия, демікпе секілді ауруларды тудыруы ықтимал.
Жергілікті тұрғындар қала билігінің қолдауымен бірнеше жыл бойы Силикат зауытының жабылуын талап етіп келеді.
Кәсіпорын иелеріне өндірісті көшіру үшін өтемақы төленіп, тұрғын үйлерден алыс жерде теңдей жаңа жер телімдері ұсынылды. Алайда зауыт басшылығы бұған келіспей, зиян келтіретін өндірісті жалғастырып отыр.
2022 жылдың ақпанында астана әкімдігі мен Экология министрлігі сот арқылы зауыттың жұмысын мәжбүрлі түрде тоқтатуға қол жеткізген. Бірақ кейін бұл шешімнің күші жойылып, зауыт қайта жұмыс істей бастаған.
Биыл шілдеде Астана әкімдігі кәсіпорынға жаңа жер телімдерін рәсімдеуді міндеттеу туралы талап арызбен сотқа қайта жүгінді.
Бірінші инстанция соты әділ шешім шығарып, әкімдіктің талабын қанағаттандырды.
Қолданыстағы заңнамаға сәйкес, бұл шешім енді қалалық сотта қайта қаралады.
Промышленный тұрғындары шешім өзгеріссіз қалып, Силикат зауытының өндірісі тұрғын үйлерден алыс жерге көшіріледі деп үміттеніп отыр.
Посмотреть эту публикацию в Instagram
