1 тамыз күні «Астана Арена» стадионында әлемге әйгілі америкалық әнші Дженнифер Лопестің үлкен концерті өтті. Кеш аяқталған соң көрермендер ерекше мәдениет пен жауапкершілік үлгісін көрсетті. Олар трибуналардан асығыс кетіп қалмай, стадион аумағында қалған қоқысты жинауға кірісті, деп хабарлайды Todayinfo ақпарттық агенттігі елорда әкімдігінің ресми сайтына сілтеме жасап.
Бұл бастама кездейсоқ емес. Концерт барысында көрермендер назарына бұрыннан елге таныс ерекше кейіпкер — Тазабек алып қуыршағы ұсынылды. «Тазалықты қолдасаң, құшақтасайық!» деген жазуы бар плакат ұстаған Тазабек стадионды аралап, қонақтарды қоршаған ортаға жауапкершілікпен қарауға шақырды. Қала тұрғындары мен қонақтары экологиялық кейіпкермен суретке түсіп, әлеуметтік желілерде сторис бөлісіп, акцияға қолдау білдірді.
Әсіресе шетелдік қонақтар бұл бастаманы жылы қабылдап, Қазақстандағы экологиялық мәдениеттің дамып келе жатқанын ерекше атап өтті. Көрермендердің белсенділігі Тазабектің мақсатын толық ашып берді — табиғатты қорғау қиын емес, керісінше, көңілді әрі ортақ құндылық екенін көрсетті.
Концерт аяқталған соң стадионда қалып, тазалыққа үлес қосқан көрермендер әрекеті әлеуметтік желілерде кеңінен таралып, көпшіліктің оң бағасына ие болды. Бұл кеш тек музыкалық шоу ғана емес, азаматтық белсенділік пен экологиялық жауапкершілік мерекесіне айналды.
Айта кетейік, Тазабек экологиялық қозғалыстың символы ретінде бұған дейін де елорданың түрлі қалалық іс-шараларында бой көрсеткен болатын. Ол қала тұрғындарына қарапайым әрекеттер арқылы үлкен өзгеріс жасауға болатынын үнемі еске салып келеді.
Фото: gov.kz
