Астанадағы көпбейінді облыстық аурухана №2 дәрігерлері жаңа туған нәрестенің өліміне кінәлі деп айыпталуда. Қажымұқан ауылының тұрғыны Айғаным Қалабай кесарь тілігі арқылы босанғаннан кейін сәбиі шетінеп кеткен. Марқұмның туыстары әйелді алғашқы күні ауруханаға жатқызбай қайтарған медицина қызметкерлерін кінәлап отыр. Облыстық денсаулық сақтау басқармасы қызметтік тексеруді бастады.
Оқиғаның мән-жайы:
27 жастағы Айғаным Қалабайдың айтуынша, 14 қарашада оған жоспарлы кесарь тілігі жасалуы керек болған. Бірақ, босанушы алғаш рет ауруханаға келгенде, оны қабылдау бөлімінен қайтарып жіберген. Келесі күні таңертең толғақ қатты басталғанда, Айғаным қайтадан ауруханаға барған. Оны қабылдағанымен, кезекші хирург келіп қарағанша операция кешке шегерілген.
«Хирург мені тексеріп, ішімнің қатты екенін айтты. Сосын: «Сағат нешеде келдің?» деп сұрады. Мен таңғы 10-да келгенімді айттым. Ол: «Неге кешке дейін күттіңдер, ашылу бар ғой. Неге түнге қалдырасыңдар, қазір кесарь тілігін жасайық» деді. Содан кейін маған жатуымды айтты, бірақ баламды бермеді», — дейді марқұмның анасы.
Кейінірек әйел жаңа туған нәрестесінің ауыр халде жансақтау бөліміне жатқызылғанын білді. Айғанымның айтуынша, дәрігерлер баланың қағанақ суын жұтып қойып, өкпесіне инфекция түскенін айтқан. Оған антибиотиктер тағайындалғанымен, көмектеспеген. Түнде нәрестенің жүрегі екі рет тоқтап, таңертең әкесіне баланың қайтыс болғанын хабарлаған.
«Бұған дейін оған КТ, УЗИ жасап, жағынды, қан алып, бәрі 100 пайыз жақсы, алаңдамау керек деген. Бала қайтыс болғаннан кейін, олар басқаша сөйлей бастады: КТ-да түсініксіз, жаман нәрсе болған, инфекция болған деп», — дейді туысы Гүлзада Елубаева.
Тергеу жұмыстары:
Ақмола облысының денсаулық сақтау басқармасында нәрестенің денесі сот-медициналық сараптамаға жіберілгенін айтты.
«Жүкті әйел 14 қарашада аталған аурухананың акушерлік бөліміне жүгінген, көрсеткіштер болмағандықтан, оған жатқызудан бас тартылды. Бірақ 15-і күні ол №2 көпбейінді аурухананың акушерлік бөліміне түсті, 15-і күні кесарь тілігі жасалды. Толық мерзімді тірі бала дүниеге келді. Бірақ бала туылған кезде асфиксия жағдайында болды, ол ауыр халде жансақтау палатасында жатты. Қазіргі уақытта бұл факт бойынша қызметтік тексеру жүргізілуде», — деп түсіндірді Денсаулық сақтау басқармасының басшысы Нұрлан Ахилбеков.
Ақмола облысы әкімдігінде әрбір осындай жағдайды жеке қарайтынын атап өтті.
Марқұмның туыстары құқық қорғау органдарына арыз жазған. Олар аурухананың медицина қызметкерлерінің жұмысын мұқият тексеріп, кінәлілерді жазалауды талап етуде. Полиция департаменті облыстық денсаулық сақтау басқармасының тексеруінен кейін ғана шешім қабылданатынын түсіндірді.
