ҚР Қаржы мониторингі агенттігінің Алматы облысы бойынша департаменті «Amanat Drive» атауымен қызмет көрсеткен ірі қаржы пирамидасын анықтап, оның заңсыз әрекеттерін әшкереледі, деп хабарлайды Todayinfo.
Тергеу мәліметтеріне сәйкес, қаржы пирамидасының ұйымдастырушылары азаматтарға пайызсыз бөліп төлеу арқылы жылжымайтын мүлік пен автокөлік сатып алуды уәде еткен. Алайда бұл міндеттемелер толық орындалмаған. Мүліктер, негізінен, ұйымдастырушылардың жақындары мен туыстарының атына рәсімделген.
Нәтижесінде аталған қаржы пирамидасы 8 мыңнан астам салымшыны тартқан. Олардың салған жалпы қаражаты 21 миллиард теңгеден асып кеткен.
«Қаржыны заңдастыру мақсатында ұйымдастырушылар бірнеше деңгейлі заңсыз схема құрған. Олар өз бақылауындағы «Алло, не керек», «i-m@rketing», «Gold SapaPremium» ЖШС-ларын пайдаланып, жалған жеткізуші ретінде көрсеткен. Құжат жүзінде бұл компаниялар жарнама қызметтері мен нарықтық талдау жүргізген болып көрінген», — деп хабарлады ҚР Қаржы мониторингі агенттігінің Алматы облысы бойынша департаменті.
Осы жалған шарттар арқылы 1,8 млрд теңгеден астам қаражат қолма-қол ақшаға айналдырылып, сыртқа шығарылған.
Тергеу барысында Астана қаласындағы пәтерлер, жеке тұрғын үйлер, сондай-ақ HUMMER H2 және Lexus LX570 секілді қымбат автокөліктердің сатып алынғаны анықталды. Бұл мүліктер сенімді тұлғалардың атына рәсімделіп, тәркілеуден жасырылған.
Сот санкциясымен көрсетілген мүлік пен тұтыну кооперативінің банктік шоттарына тұтқын қою шарасы қолданылды.
Қаржы пирамиданың бас ұйымдастырушысы қамауға алынды. Қазіргі уақытта тергеу амалдары жалғасуда. ҚР Қылмыстық іс жүргізу кодексінің 201-бабына сәйкес тергеудің өзге мәліметтері жария етілмейді.
