31 мамыр күні Астанада Абай және Республика даңғылдарының қиылысындағы монументке гүл шоқтарын қою рәсімі өтті, деп хабарлайды Todayinfo ақпараттық агенттігі.
Халқымыздың басынан өткен ең бір қасіретті кезеңдердің бірі – саяси қуғын-сүргін мен ашаршылық құрбандарын еске алу, тарихи жадымызды жаңғыртып, ұлттық бірлігімізді нығайтатын тағылымды шара болды.
Іс-шараға қоғам қайраткерлері, мемлекеттік органдардың, саяси партиялардың, қоғамдық ұйымдардың өкілдері мен жоғары оқу орындарының басшылары қатысты.
Әр буын өкілі ел тарихына деген құрметін білдіріп, тәуелсіздіктің қадірін терең түсінуге шақыратын азаматтық ұстанымын көрсетті.
Монументке гүл шоқтары Астана қаласының Ардагерлер кеңесі, мәслихат депутаттары, Қоғамдық кеңес, «AMANAT», «Ауыл», «Байтақ» партиялары, Қазақстан халқы Ассамблеясы, жоғары оқу орындары мен бірқатар қоғамдық бірлестіктер атынан қойылды.
Қатысушылар саяси қуғын-сүргін мен ашаршылық құрбандарын бір минут үнсіздікпен еске алды.
