Астана қаласының әкімі Жеңіс Қасымбек елордада инфрақұрылым мен әлеуметтік нысандарды дамытуға ерекше көңіл бөлініп отырғанын мәлімдеді. Оның айтуынша, қала құрылысы кезінде ең алдымен тұрғындардың өмір сүру сапасын арттыруға бағытталған жобалар іске асырылуда, деп хабарлайды Todayinfo ақпараттық агенттігі.
– Астананы дамыту барысында инфрақұрылымдық және әлеуметтік нысандардың салынуына ерекше мән береміз. Оларға тіршілікті қамтамасыз ету жүйелері – жылу, электр қуаты, су, сондай-ақ мектептер, балабақшалар мен оқушылар сарайлары кіреді. Біз әлеуметтік нысандардың құрылысына жеке инвестицияларды да тартамыз, – деді әкім.
Бүгінде елордада барлығы төрт оқушылар сарайы жұмыс істейді. Оның екеуі мемлекеттік, қалған екеуі – жекеменшік. Былтыр жалпы саны 4 мың балаға арналған екі жеке оқу және шығармашылық орталық пайдалануға берілген. Олар:
• «Sana Bilim» – 2 мың орындық нысан (Тұран даңғылы бойында);
• «Sana Sport» – спорттық және шығармашылық бағыттағы 2 мың орындық орталық (Қажымұқан көшесінде).
Әкімнің айтуынша, қазіргі уақытта тағы төрт жаңа оқушылар сарайының құрылысы жүріп жатыр. Оның үшеуі мемлекеттік қаржы есебінен, ал біреуі жеке инвестициялар арқылы салынып жатыр.
Биыл пайдалануға берілетін нысандар
• «TANYM» көпфункционалды кешені – Мұхамедханов пен Шыңғыс Айтматов көшелерінің қиылысында орналасқан, 2000 орынға арналған мемлекеттік нысан.
• «BIART» шығармашылық индустрия мектебі – Сығанақ көшесі, 17/41 мекенжайында орналасқан, 2000 орындық жекеменшік жоба.
2026 жылы іске қосылатын нысандар
• Ақан Сері мен С189К көшелерінің қиылысындағы 2000 орындық көпфункционалды кешен (мемлекеттік).
• М.Төлебаев көшесіндегі 2000 орындық көпфункционалды кешен(мемлекеттік).
2027 жылға жоспарланған жобалар
• Түркістан даңғылы мен Бұқар Жырау көшесінің қиылысындағы 2000 орындық кешен (мемлекеттік).
• Қарасай батыр мен Қарталы көшелерінің қиылысындағы 2000 орындық кешен (мемлекеттік).
Жеңіс Қасымбектің айтуынша, бұл жобалар елорданың әр ауданында балалардың бос уақытын тиімді өткізуіне, шығармашылық және спорттық әлеуетін дамытуына мүмкіндік береді.
– Қаламызда жаңа ұрпақтың жан-жақты дамуына жағдай жасау – басты міндетіміз. Сол себепті мұндай орталықтар балаларға білім алумен қатар, өнер, спорт және инновациялық бағытта өз қабілеттерін шыңдауға жол ашады, – деді әкім.
