Атырау облысында «World Clean Up Day» дүниежүзілік тазалық күні аясында кең ауқымды экологиялық сенбілік өтті, деп хабарлайды Todayinfo ақпараттық агенттігі Өңірлік коммуникациялар қызметіне сілтеме жасап.
Акцияға аймақтың атқарушы органдары, кәсіпорын қызметкерлері, еріктілер, жастар ұйымдары, экобелсенділер және жергілікті тұрғындар белсенді түрде атсалысты. Барлығы облыс көлемінде 10 мыңнан аса адам жұмылдырылды. Сенбілікке аудан әкімдіктері мен ауылдық округтер де қатысып, өз аумақтарында тазалық жұмыстарын ұйымдастырды.
Тазалық жұмыстары ауқымды аумақты қамтыды. Атырау қаласында сенбілік «Самал» ықшамауданынан «Сарыөзекке» дейінгі аралықта, сондай-ақ «Атырау» ықшамауданы жанындағы айналма көпір маңында жүргізілді. Қатысушылар қоқыс жинап қана қоймай, кейбір орындарда қураған шөпті шауып, қоқыс алаңдарын ретке келтірді. Нәтижесінде 150 тоннаға жуық тұрмыстық қалдықтар жиналып, арнайы полигондарға шығарылды.
Экологтардың айтуынша, мұндай акциялар қала мен ауылдағы санитарлық жағдайды жақсартып қана қоймай, тұрғындардың экологиялық мәдениетін арттыруға да септігін тигізеді.
«World Clean Up Day» — жыл сайын бүкіл әлем бойынша 180-нен астам елде өтетін халықаралық экологиялық қозғалыс. Бұл күні әлем бойынша 18 миллионнан астам ерікті өз аумағында сенбілікке шығып, табиғи жерлерді қоқыстан тазартады. Қазақстанда дәстүрлі сенбілік қыркүйек айының үшінші сенбісінде өтеді.
Іс-шараны Атырау облысы әкімдігі мен Табиғи ресурстар және табиғат пайдалануды реттеу басқармасы ұйымдастырды. Жергілікті билік мұндай шаралар өңірде тұрақты түрде өткізіліп тұратынын, алдағы уақытта экологиялық мәдениетті насихаттауға бағытталған жаңа жобалардың іске қосылатынын атап өтті.
