Пәкістан-Ауғанстан шекарасында қиян-кескі соғыс әлі жалғасып жатыр. Ауғанстанның шекаралас аудандарындағы «Техрик-и-Талибан» қозғалысына мүше 70-тен астам адам әуе шабуылдарынан ажал құшты, деп хабарлайды Todayinfo агенттігі.
Пәкістан тарапы олардың бәрін террористер деп санайды. Синьхуа басылымының дерегінше, Пәкістанның солтүстік және Оңтүстік Вазиристан округтерімен шектесетін аудандарда жоғары дәлдіктегі әуе соққылары жасалған.
Дереккөздердің хабарлауынша, соққылар 70-тен астам террористі, соның ішінде командирлерді де өлтірген.
«Атыс тоқтатылғанына қарамастан, Талибан лаңкестері Пәкістанның бірнеше аймағында көптеген шабуылдар жасады. Жұма күні Солтүстік Вазиристанда содырлар миналанған көлікті жарып жіберді, бір сарбаз қаза тауып, тағы бірнеше адам жарақат алды.
Соңғы 48 сағат ішінде террористер Пәкістанға Ауғанстан аумағынан бірнеше рет шабуыл жасады немесе Пәкістанға шабуыл жасау үшін кірді», — делінген басылымның хабарламасында.
Еске салайық, екі елдің арасындаңы соғыс 8 қазанда басталды. Пәкістанның шекарасына басып кірген тәлібтер бірнеше әскери бекет пен елді мекендерді қиратқан. Пәкістандық алпыстан астам сарбаз қаза тапты. Ал Пәкістан билігі жүздеген басқыншылардың көзін жойып, шекаралық бекіністерін қайтарып алғанын мәлімдеді. Әскери ұшақтар Кабул қаласын да бомбалады.
Фото: AFP VIA GETTY IMAGES
