Алматыда Халықаралық балаларды қорғау күніне арналған «BALA FEST. JARYQ SKILLFEST» атты кең ауқымды фестиваль өтіп жатыр. Бұл мерекелік іс-шараға 5 мыңнан астам бала қатысты, деп хабарлайды Todayinfo ақпараттық агенттігі.
1 маусым – Халықаралық балаларды қорғау күнінде Алматы қаласы шын мәнінде балалық шақтың, шығармашылықтың және рухани шабыттың орталығына айналды. Ұйымдастырылған BALA FEST. JARYQ SKILLFEST фестивалі балаларға тек көңілді мереке ғана емес, өз елін сүйетін, бойында азаматтық жауапкершілік сезімі қалыптасқан тұлға ретінде дамуына мүмкіндік беретін маңызды алаңға айналды.
Фестиваль Әлия Молдағұлова мен Мәншүк Мәметова атындағы саябақта өтіп жатыр. Батыр аруларымыздың есімімен аталатын саябақта өтіп жатқан мерекенің өзі – ерлікке, отансүйгіштікке үндейтін тағылымды тәрбиелік мәнге ие.
Алматы қаласының әкімі Дархан Сатыбалды фестивальге арнайы келіп, бүлдіршіндермен жүздесті. Ол жас ұрпаққа арналған осындай игі бастамаларды әрдайым қолдайтынын жеткізді. Әкімнің айтуынша, бұл – жас ұрпақты патриоттық рухта тәрбиелеудің, елдің ертеңі саналатын балалардың бойына еңбекқорлық, білімге құштарлық, туған жерге деген сүйіспеншілікті сіңірудің нақты қадамы.
Фестиваль JARYQ деп аталатын бес тақырыптық бекет форматында ұйымдастырылды. Әр бекет бала дамуының маңызды аспектілерін қамтиды:
• Jastar – технология мен инновация,
• Arman – армандар әлемі,
• Rukh – руханият пен тарих,
• Yntalyq – өнер мен шығармашылық,
• Qabilet – кәсіптік бағдар беру.
Осы алаңдар арқылы балалар тек білім алып қана қоймай, өздерін ұлтына пайдалы азамат ретінде елестетіп, болашақтағы рөлін сезіне алды. Әсіресе, Rukh бекетінде ұсынылған тарихи-танымдық контент арқылы балалар халқымыздың өткені мен батырлық жолына көз жүгіртті. Бұл – патриоттық тәрбиенің маңызды бір бөлігі.
Qabilet бекеті – биылғы Жұмысшы мамандықтар жылы аясында жүзеге асқан маңызды бастама. Бұл жерде балалар түрлі кәсіппен танысып, өз қолымен жұмыс істеп, еңбекке деген құрметті бойына сіңірді. Мұндай әрекеттер арқылы елге қызмет етудің, адал еңбек етудің қадірін сезінеді.
Дархан Сатыбалды өз сөзінде:
«Біз саналы да талантты әрі әр ісіне жауапты жаңа ұрпақты қалыптастыратын бастамаларды қолдауды жалғастырамыз. Алматы – әр бала өзіне сенетін және арманына нық қадаммен жететін қала. Біз жай ғана қолайлы орта емес, өз елінің патриоты болатын жас ұрпақты тәрбиелеуді көздеп отырмыз», – деді.
Фестиваль аясында оқушылар сарайы мен шығармашылық мектептерден келген балалар шеберлік сағаттары мен өнер перфоманстарын ұсынды. Олардың креативі мен қолөнері мыңдаған көрерменге шабыт сыйлады. Жас шеберлердің туындылары — тек шығармашылықтың жемісі емес, сонымен қатар, ел болашағына сенім ұялататын үміттің символы.
Алматы қаласында қосымша білім беруге ерекше мән берілуде. 2023–2029 жылдарға арналған Жол картасына сәйкес, бұл салаға бөлінетін қаржы көлемі жыл сайын артып келеді. Бұл – келешек ұрпақты жан-жақты дамытып қана қоймай, оларды елін сүйетін, қоғамға пайдалы тұлға ретінде қалыптастыруға бағытталған жүйелі саясаттың бір бөлігі.
