Кеше Астана қаласындағы №2 облыстық көпбейінді ауруханада жас келіншектің түсік тастауы бойынша орын алған жағдай қоғам назарын аудартты. Бұл оқиғаға қатысты бүгін аталған мекеменің директоры Изат Бюрабеков ресми мәлімдеме жасап, мәселенің мән-жайын түсіндірді, деп хабарлайды Todayinfo ақпараттық агенттігі.
Бас дәрігердің айтуынша, оқиға туралы әлеуметтік желіде ақпарат таратқан блогердің жазбаларында нақты жағдай бұрмаланған. Осыған байланысты дәрігерлер блогерге қарсы Қазақстан Республикасы Азаматтық кодексінің 143-бабы — «Ар-намысты, қадір-қасиетті және іскерлік беделді қорғау» аясында сотқа талап арыз дайындап жатыр. Бюрабековтың сөзінше, даулы жазбалар қазір әлеуметтік желіден өшірілген.
Изат Бюрабеков Диана есімді пациенттің ауруханаға түскеннен бастап тұрақты бақылауда болғанын атап өтті. Оның айтуынша, науқастың жағдайы әр 1,5-2 сағат сайын тексеріліп отырған. Егер қан кету қаупі жоғары болған жағдайда, басқа емдеу тактикасы қолданылатынын айтты.
«Бұл жағдайда қатты қан кету тіркелмеген, тек шамалы қан аралас бөлінділер байқалған. Гемоглобин деңгейі қалыпты шектерде болған», -деді бас дәрігер.
Аурухана қызметкерлері жүктілікті сақтау үшін барлық қажетті медициналық шараларды қабылдаған. Алайда, Изат Бюрабеков түсіндіргендей, әйел ағзасындағы түсік процесі тоқтатылмаған.
«Мұндай жағдайлар жүктіліктің ерте кезеңінде жиі кездеседі. Науқастың жүктілік мерзімі — 6 апта 5 күн. Әдетте жүктілікті есепке алу 8-12 апта аралығында жүргізіледі», — деді ол.
Бас дәрігер әлеуметтік желіде тараған «жаңа туған сәбиден айырылды» деген ақпаратпен келіспейтінін мәлімдеді. Оның айтуынша, бұл жағдайда әлі толық қалыптаспаған, ұзындығы 3-6 мм болатын эмбрион туралы сөз болып отыр.
