Батыс Қазақстан облысында Әдеп жөніндегі кеңестің кезекті отырысы өтті. Кеңестің жұмысына мемлекеттік органдардың басшылары, әдеп жөніндегі уәкілдер, бұқаралық ақпарат құралдарының өкілдері қатысты, деп хабарлайды Todayinfo.kz ақпарат порталы.
Осылайша, күн тәртібіне сәйкес, мемлекеттік қызмет саласындағы заңнама және қызметтік әдеп талаптарының сақталуы мәселесі бойынша Шыңғырлау ауданы әкімі М. Өмірәлиевтің есебі тыңдалып, заңнама бұзушылықтарының алдын алу шаралары туралы баяндады.
Сондай-ақ, Батыс Қазақстан облысы бойынша бәсекелестікті қорғау және дамыту департаментінің әдеп жөніндегі уәкілі қызметтік әдепті сақтау мониторингі мен бақылау жұмыстарының нәтижелері туралы есеп берді.
Сонымен қатар, орталық мемлекеттік органдардың аумақтық бөлімшелері мен жергілікті атқарушы органдарда өткізілген
бос мемлекеттік әкімшілік лауазымдарға орналасу конкурстарының талдау нәтижелері қаралды.
Конкурстардың басым бөлігі ашық және меритократия қағидаттарына сай өткізілгенімен, дербес мемлекеттік органдарда әңгімелесу кезеңдерінде ұйымдастырушылық сипаттағы кемшіліктер орын алған.
Бұл ретте, кандидаттардың кәсіби және тұлғалық қасиеттерін бағалау кезінде объективтілік пен ашықтықты қамтамасыз
ету қажеттігіне назар аударылды.
«Мемлекеттік қызметке іріктеу процесі ашық әрі әділ
болуы – мемлекеттік аппараттың тиімділігі мен қоғамның сенімін арттырудың басты факторы. Сондықтан конкурстық комиссиялардың жауапкершілігі мен кәсібилігі жоғары деңгейде сақталуы тиіс», – деді Әдеп жөніндегі кеңестің төрағасы М. Байсалов.
Бұдан бөлек, 2025 жылғы 3-тоқсанның қорытындылары бойынша орталық мемлекеттік органдардың аумақтық бөлімшелері мен жергілікті атқарушы органдардың тәртіптік практикасын талдау нәтижелері қаралды.
Осылайша, дербес мемлекеттік органдарда профилактикалық-түсіндіру жұмыстарының жеткіліксіздігі, сондай-ақ басшылық құрам тарапынан қызметшілердің тәртібін бақылау тетіктерінің әлсіздігі байқалды.
Департаментпен қабылданған шаралардың нәтижесінде 3 мемлекеттік қызметшіге заңнама талаптары бұзыла отырып қабылданған тәртіптік жаза қолдану туралы актілердің күші жойылып, бұзылған заңды құқықтары қалпына келтірілді.
Кеңестің мүшелері талдау нәтижелерін назарға алып, мемлекеттік органдарға қызметтік тәртіп пен әдеп нормаларын сақтау бойынша нақты шаралар қабылдау, сондай-ақ тәртіптік тәжірибені жүйелі түрде бағалап отыру жөнінде ұсынымдар әзірледі.
Соған қоса, қызметтік әдеп талаптарын сақтамау фактісі бойынша Бәйтерек және Теректі аудандары әкімдіктерінің лауазымды тұлғаларына қатысты тәртіптік іс материалдары қаралып, Кеңеспен тиісті тәртіптік жазаны қолдану туралы шешім қабылданды.
Әдеп жөніндегі кеңестің төрағасы Мұрат Байсалов өз сөзінде мемлекеттік қызметшілердің кәсіби этикасын сақтау, адалдық қағидаттарын ұстану және қоғамның мемлекеттік аппаратқа деген сенімін нығайту қажеттігін атап өтті.
«Әдеп кодексінің нормалары – әрбір мемлекеттік қызметшінің күнделікті қызметінде басшылыққа алатын негізгі қағидаттары. Бұл қағидаларды сақтау – қоғамның мемлекетке деген сенімін арттырудың басты кепілі», – деді Кеңестің төрағасы.
Отырыстың қорытындысы бойынша тиісті ұсынымдар қабылданып, мемлекеттік органдарға нақты тапсырмалар берілді. Кеңестің мүшелері ұсыныстарды орындау барысында қызметтік тәртіпті нығайту мен әдеп мәдениетін арттырудың маңыздылығына ерекше тоқталды.
