Бұл туралы БҚО әкімі Нариман Төреғалиев «Казахстанская правда» газетіне берген сұхбатында баяндады, деп хабарлайды Todayinfo ақпараттық агенттігі.
Мемлекет басшысы инвестиция тарту жұмысын күшейтудің маңызын үнемі атап өтуде. Бұл бағытта БҚО-да нақты істер жүзеге асуда.
Облыс әкімінің баяндауынша, соңғы екі жылда негізгі капиталға тартылған инвестиция көлемі 1,4 трлн теңгені құраған. Оның ішінде жекеменшік инвестиция көлемі – 986,4 млрд теңге, бұл жалпы көлемнің 72,6%-ын құрайды.
2023–2024 жылдары облыста жалпы құны 134 млрд теңге болатын 66 жоба іске асырылып, шамамен 1600 жаңа жұмыс орны ашылды.
Өңір басшысы алдағы 5 жылда жалпы құны 2,6 трлн теңге болатын 73 инвестициялық жоба жүзеге асырылатынын жеткізді.
«Биылғы жылдың 5 айының қорытындысы бойынша негізгі капиталға тартылған инвестиция көлемі 6,9%-ға артып, 193,5 млрд теңгені құрады. Бұл – 2024 жылдың сәйкес кезеңіндегі көрсеткіштерден жоғары. Биыл жалпы сомасы 56,9 млрд теңге болатын 35 жобаны іске қосу жоспарланған, нәтижесінде 837 жаңа жұмыс орны ашылады. Оның ішінде 3 жоба сәтті жүзеге асырылды»,- деді өңір басшысы «Казахстанская правда» газетіне берген сұхбатында.
